[年齡無界限] 就係咁，我最近出席好多喪禮: ３７　小段的尷尬

佢地都坐左落嚟，我地三個人就坐埋一枱吹水。

「咁珍妮妳仲有無其他工啊？」我問，但係佢好斬釘截鐵咁話：「無，我唔會幫一Ｄ唔想自己變好嘅人。」

珍妮講完呢句後，小段一野打左過去，而珍妮又話：「咩啊，你覺得輝爺個仔抵幫咩？」

其實，佢講得都好岩。

「如果你另一個朋友都係個咁嘅人的話，我都唔會幫架。」佢所講嘅果個人，應該係蔡老闆。





「輝爺嘅朋友？」小段問，係ＷＯ，佢唔知我叫珍妮幫手搵工比蔡老闆架ＷＯ。

「輝爺叫我幫佢一位老過佢嘅朋友搵工，不過真係有Ｄ高難度。」小段一聽到珍妮話我個朋友老過我嘅時候，雙眼好錢變左錢嘅符號，望住我笑左一笑。

我諗我知道佢而家諗緊咩。

「輝爺，你都知道人係幾咁化學架啦，今日唔知聽日事，如果一個唔小心真係大吉利是講句，死左都唔知咩事架。」又係果種烚熟狗頭嘅笑容，「咦！？咁岩我呢度有一個計劃好岩你朋友架ＷＯ。」

你又未見過我朋友，你又點知呢……





「拿，唔係咒你朋友，如果聽珍妮所講，你朋友年紀大過你嘅話，姐係面對嘅風險比你更大，亦姐係話，佢更需要一份好周詳嘅計劃幫佢設計一下佢身後事應該點做，佢有無親人？」

我諗一諗答佢，「佢算無。」

「最好嘅朋友？」小段又問。

「我同另一位上左年紀嘅朋友。」我答。

「咁就死得啦真係。」聽到小段講呢一句後，我打左個突，而形妮就係旁邊反緊白眼。





「點解呢？」我問。

「如果，拿我話如果，你同你果位朋友都咁大，其實都係需要人照顧嘅年紀，你又點會有咁多時間睇住佢呢，坦白Ｄ講，有時可能自己都照顧唔到自己架。」佢遞左份計劃書比我，「比你個朋友，認真唔係咒你個朋友，多一份參考都好嘛。」

我望一望份計劃書，再望一望小段，開口話：「小段，點解你唔轉行做保險，可能你搵得仲多ＷＯ。」

「係囉，而你呢Ｄ口才，可能賣保險仲多客啦。」珍妮答話。

不過小段聽到我地兩個咁講後，只係好尷尬笑左幾下後話：「唔講呢Ｄ啦，飲茶飲茶。」

睇嚟，小段有Ｄ不可告人嘅秘密係無比我地知。