[年齡無界限] 就係咁，我最近出席好多喪禮: ３６　逗趣的二人

其實，係呢個時侯見到佢地，都幾尷尬，不過，有珍妮呢個咁心直口快嘅人係度，尷尬好快被打破。

「阿伯，果個就係你個仔啊？咁大個人都無咩責任呢嘅？」佢一開口就咁問，小段聽到就輕輕推一推佢，但佢就無理到，繼續佢嘅肆無忌憚，「咁係嘛，頭先阿伯都有話果個男人成四十歲人，但做野都咁吊兒郎當咁。」

珍妮講嘅野，都岩嘅。

「唔好意思啊輝爺，因為頭先我地坐附近，所以聽到少少。」小段唔好意思咁對我講。

「邊至少少啊，聽晒咁滯啦。」珍妮呢個人真係毫不客氣，本身企係度嘅佢坐低左，然後話：「我比左果幾份工都係好適合佢，佢竟然話一份都唔岩，浪費我嘅時間。」





「可能……佢覺得唔適合呢。」點解，點解我會為龍仔搵借口……因為佢係我個仔，就係咁簡單。

不過，珍妮嘅心直口快，「阿伯，你仲為左你個仔搵借口，佢唔幫得架，再幫嘅話唔會改架。」

呢一句，正中我心處。

「喂！妳唔好咁八掛好唔好啊。」本來企係度嘅小段，都坐左落嚟對珍妮話：「呢Ｄ係人地嘅家事，妳就未理啦。」

「唔得ＷＯ，咁我而家知道左，點都要發表下我自己嘅意見啦，而且阿伯叫我搵工比佢個仔，如果佢個仔係個咁吊兒郎當嘅人，我仲點搵工比佢啊。」





「妳第一次見人，妳又知晒人地嘅野嘅。」

「睇人，第一眼就睇得出性格架啦。」

「妳有無咁勁啊，咁妳第一眼睇我係個咩野人？」

「係一個見錢眼開嘅人囉。」

我聽到珍妮講呢句後，笑左出嚟：「係啊，我第一眼見到小段，都覺得佢係一個見錢眼開嘅人。」





珍妮見我都咁講，一副理直氣壯咁話：「你睇，連阿伯都咁講你啊。」

「小姐，其實你可以叫我輝爺，唔駛下下都阿伯咁叫我。」我同珍妮講。

「咁你係阿伯ＷＯ。」佢嘅回應，我真係唔知點答好。

用左當個鐘，小段先令到珍妮改口叫我做輝爺，見到佢地兩個，就好似見到一對識左好耐嘅朋友一樣，打鬧講笑，不過我睇得出，係小段嘅眼神入面，唔止咁簡單。