[年齡無界限] 就係咁，我最近出席好多喪禮: ３５　龍仔

約左個仔係茶樓，唔知係未好耐無見個仔，心情有少少緊張，緊張嘅係，點解佢咁耐都唔嚟。

就當我諗住叫個阿姐加水嘅時候，終於見到個衰仔，「呢度啊！」

佢一副漫不經心行左過嚟後坐低左，第一句同我講嘅野，唔係問侯我，唔係講唔好意思遲左，而係……「叫左Ｄ咩野食啊？」

我拎左剛剛圈左嘅紙比佢，「我圈左呢Ｄ，你睇下仲有無野要。」

「你圈左點解唔遞出去啊？」佢問。





「驚你仲有野想叫，所以未遞。」我答佢。

「一早遞嘛應該，咁姐係我而家要等先有得食啦。」佢一副厭棄嘅樣話，然後就叫左個阿姐過嚟，遞左張紙比佢。

無錯，呢個就係我個仔，龍仔。

「係呢龍仔，有無睇我ＳＤ比你嘅工啊？」我問佢，而佢只係玩緊自己部電話，點一點頭。

無啊，果Ｄ上左少少年紀四十幾歲嘅人，都好鐘意拎住部電話玩。





「咁有無邊份工你有興趣架？」我又問佢。

「無ＷＯ。」佢答得好理所當然。

「咁多份一份都無？我睇到有份好似幾岩你架……」「你未撚煩啦，我自己知自己想做Ｄ咩，你覺得果份岩我嘅可能我自己唔覺得呢。」佢講到咁，我都無再將我嘅說話講落去。

「……咁……你而家做緊Ｄ咩？」我問佢。

「前排係地盤撈散，呢幾日無野做未等工開囉。」佢答，而頭先叫左嘅野食都嚟左。





「撈散唔長遠架，不如搵份長工做住，個個月有糧出未幾好，唔駛成日擔心無錢用。」我話，但食緊野嘅佢無理過我。

「你年紀都唔駛架啦，都要Ｄ錢搵個伴架。」我講完呢一句話後，龍仔佢停低左食野，有少少發脾氣咁話：「你唔撚好次次約親我出嚟都煩我呢樣煩我果樣好唔好，我都唔撚明，我覺得而家自己生活得幾好，做咩要變。」

「唔變？我都年紀大啦，唔知仲可以睇得你幾耐，你阿媽都一樣架，而且你成四十幾歲人，唔會仲要痴住個阿媽掛，男人到你呢個年紀，係應該置頭家架。」我呢句話，其實同佢講左不下數十次。

「置家？好似你咁啊？為左生我出嚟先同阿媽結婚咋，你唔好講添啊，你果陣未徵求我嘅同意就生我出嚟，我都未同你計啊。」點解次次都要搞到呢個局面……龍仔好無癮咁望住我，然後繼續食野。

每次佢講呢樣野，我都唔知可以點回應佢，因為我總覺得，佢今時今日變成咁，我唔多唔少都有Ｄ責任。

「食飽，你仲有無野講啊？」佢問我。

「你……阿媽呢排點？」我問。

「佢幾好，係有Ｄ病痛，不過係Ｄ老人病。」佢答凡。





「咁你照顧多Ｄ佢啊。」我話，而佢就點一點頭回應我：「如果無其他野嘅話，我走拿。」佢呢一句說話都未講完，已經起晒身準傭走。

「龍仔，果Ｄ工你再睇下，睇下有無邊一份岩你啦。」佢臨走前我再叮囑佢，但係佢無回應我就走左。

剩返嘅，係我以及面前食剩嘅食物……「唉……」長嘆一聲，我對住呢個仔都唔知可以點。

突然間，係我身後面有一個人叫我，「輝爺……咁岩啊。」我望一望身後面，原來係小段，而佢身後仲有一個人，係珍妮。

「咁岩啊，你地……」「我剛剛見完客，又好彩撞到，所以一齊嚟飲茶囉。」唔知，我同呢個兩人係未特別有緣呢？