[年齡無界限] 就係咁，我最近出席好多喪禮: ３１　蔡老闆嘅犧牲

入夜，去到阿然嘅夜冷店，見到一早已經落左大閘，但係閘嘅Ｄ窿仲見到入面開緊燈，「咁早就關門，唔係約左我咩？」

我嘅大叫，換來嘅係腳步聲及開門，「諗住早Ｄ關門，同你聚一聚。」

我地兩個對望，互相笑左出嚟。

我同佢，椅靠住個櫃臺，阿然預備左一包花生同酒，「我地好耐，無兩兄弟吹水拿。」

「尋晚未係囉。」我笑住話，然後就剝起花生食。





而佢就包我倒左Ｄ酒後話：「我意思係只得我地兩個。」

同呢個兄弟，由讀書就識，入埋同一間大學，工作又一齊拼駁過，可以話，一生有三份一都出現左佢嘅存在。

「諗下諗下，我地無見三十幾年。」就去見呢一位兄弟，係蔡老闆公司清盤果次。

「如果計見面就係，我有次打過比你話結婚，你無理我咋。」我笑住話，然後佢都笑住答：「你話果次假結婚嘛，你都講左話係假，我仲嚟做咩。」

「就係果次，嘈左之後我地兩兄弟就再無見過。」我話，而佢聽到我咁講後，靜左一靜後回我話：「係啊，咁樣就三十年。」佢舉起杯示意同我碰杯，而我，都應左佢呢個要求。





有時真係可以為左一啖氣，無見一個識左好耐嘅兄弟，但係其實大家都心知肚明一早已經無左放件事係心上面，只不過，總係想比一個好嘅落臺階比雙方。

「果次之後，點啊？」佢問。

我嗤笑左一下話：「有咩點，生左個仔後，個女人落到嚟就同我離婚，然後我未一支公左幾年，又同左令一個女人結婚。」

「咁都幾好啊。」聽得出佢呢句係為應而答。

「有幾好啊？」我反問返佢，而佢就笑笑口話：「飲啦，唔講咁多。」





飲左幾杯後，我又問佢：「你都好啦，見你個仔咁生性。」

「都係架，我見到佢咁都好安慰，不過……」唔知點解佢講到呢度欲言又止，「有時世事嘅野，好難預料。」

「難預料？」我問，但係佢無答我呢個問題，「唔講呢Ｄ住，我有Ｄ野想比你知，你等等。」

佢講完呢句後，就走開左，返嚟果陣手上面多左一份公民袋，「呢樣野想比你睇下。」

我接過左呢一份公民袋，見到嘅，係一份又一份嘅資料，「呢份係……」

「蔡老闆當年瞞住我地，自己孭住好多嘅債，佢用晒自己所有嘅積蓄還債，呢Ｄ野，係我花左少少時間叫人去搵嘅資料。」阿然話。

我望一望呢Ｄ資料，然後問阿然：「但當年蔡老闆唔係清左盤咩，應該唔駛上身架。」

「公司嘅野就唔駛，但係佢家人帶比佢嘅債，佢就用晒所有積蓄去還，呢一個，就係蔡老闆變成今日咁嘅導火線。」阿然嘅語氣講得好沉重，而我亦都係一樣。