[年齡無界限] 就係咁，我最近出席好多喪禮: ３０　一把好熟嘅聲音

拎住岩阿仔嘅兩份工行到門口，「得拿，我自己走得架拿，唔駛送。」

「你真係唔考慮下得閒嚟呢度坐？」因為珍妮由頭先剛講完工作嘅野，就不停叫我入會，我真係唔想比佢煩到，所以勁快咁話想走。

「唔拿，我裝慣香嘅，唔慣擺鮮花。」我答佢，但佢竟然同我講：「唔怕，慢慢就慣，香放左係度慢慢就會燒晒，但花唔會ＷＯ。」

「花都會謝架。」我答佢。

「但香燒得快Ｄ定花謝得快Ｄ先？」我聽到佢呢一個問題後，真心笑左出嚟：「真係唔夠妳講，我得閒就嚟坐下啦，不過我一定唔會入教。





「好好好！一言為定！」我都唔知我答應左珍妮呢件事，係好事定壞事呢？但見佢幫我個仔搵工份上，當係得閒上嚟問佢仲有無其他工啦。

行出呢個教會，去到個電梯前面，等……呢Ｄ舊式大樓嘅老爺升降機都慢過人，不過我呢一Ｄ老人家平時都大把時間，所以等下都無咩所謂。

直到，門一開。

「記唔記得果日除姑娘整嘅蛋糕啊，真係好好味。」呢把聲，好熟。

「係啊，唔知佢會唔會再整。」係幾個老婦傾緊計。





我入到升降機入面，聽到把聲都忍唔住想幫清楚頭先把聲咁熟果個人，佢把聲真係好熟……不過，因為有人擋住左我嘅視線，我始終見唔到果個人係邊個。

我只係見到，佢手腕上，有一條我見過嘅鏈。

果條鏈，佢戴過，而且係我送比佢。

正當我想衝出去果陣，升降機已經關左門。

真係佢？





咁多年無見佢，唔知佢點呢？

如果佢仲係度，唔知另一個人仲……

落到地下，本身好有衝動上返去睇下果把聲嘅人係未我腦海入面果個人，不過，呢個時候個電話響起。

好日唔響，係要等我有野想做先響……「喂！」

「駛唔駛咁嘅語氣啊……」聽把聲，原來係阿然。

我轉身望住身後剛剛關上嘅升降機門……「無，忙緊Ｄ野姐。」都係下次再用機會先咁做。

「係未真係咁忙架，聽蔡老闆話你退左休，仲有咁多野忙。」阿然笑住咁話。

「你理得我，點啊，打比我做咩？」我問佢。





「睇下你今晚有無時間，有Ｄ野想同你傾傾。」阿然突然有Ｄ認真咁同我講。

「可以，今晚去你度傾？」我問。

「好啊，咁今晚見啦。」佢講完後，就結束左呢一次嘅對話。

臨離開呢一座大樓，再望一望身後，總係有一種落莫嘅感覺，因為呢個人，係曾經令我魂牽夢縈嘅人，佢都算係我嘅初戀，如果係我單方面想法嘅話。

可能你地聽到我咁講，會笑我呢一位老人家咁老，就唔好係度發春發姣，但當你地到我呢個年紀就會知道，無論人生任何嘅往事，到最後都會成為你回味嘅果實，無論係好定壞，都係一樣。

就好似，今晚阿然將會同我講嘅野一樣。