[年齡無界限] 就係咁，我最近出席好多喪禮: ２９　搵多份工

收到珍妮嘅地址後，我就搵一搵果個地方係邊度，發現係一個教會嘅地址，佢應該唔會想踢我入教掛。

唔理拿，到時候聽完份工岩唔岩個仔做就閃，費時同呢個珍妮講咁多野……唔係ＷＯ，可以叫佢幫我做多樣野。

去到個地址，見到門口大大個十字架嘅裝飾，「……應該係呢度。」我按一按門鐘，無人應門，不過我聽到一下門鎖開左嘅聲音。

推門入去，見到幾個人坐左係到聽緊一個牧師講緊穌，「呢位迷途嘅羊，有咩可以幫到你？」我眼定定望住牧師，「你叫我啊？」

「係啊，呢一位年紀老邁嘅迷途老羊，有咩可以幫到你？」牧師你唔好以為呢度係你地頭我唔敢發你圍ＷＯ，我以前都有拜下關公架我話你聽。





正當我想同呢位牧師切搓下之際，珍妮突然出現話：「ＦＡＴＨＥＲ，呢位老羊係我朋友，佢嚟搵我架。」

咩老羊啊！？妳講野咁無禮貌係未呢度學返嚟架！

「咁麻煩妳照顧呢位老羊拿。」仲老羊ＷＯ！你信唔信我即時表演神打比你地睇啊！

比珍妮拉左埋一邊後，佢就話：「我地呢度好好架，好多弟兄姊妹互相幫忙，而且我地唔講大話，所有野都直接講。」

咁唔怪得妳講野咁摟打啦。





「阿伯，你有無興趣入會啊，我估你平時都無所事事架啦，不如就……」「等等，我今日嚟只係想聽下我個仔份工，唔想入咩野會，唔該妳快Ｄ講完我就閃架拿。」我未等佢講叫我入會，我已經講左我今次嚟嘅目的，因為我怕佢一開始佢自己嘅話題，我有排都唔走得。

「咁好啦，講左工作先。」珍妮拎左一份野出嚟，打開左好詳細咁同我講左幾份工，真係估唔到，見佢平時無咩禮貌，但做野又幾整齊下，都講得唔錯，當中有兩份都幾岩我個仔，遲下拎比佢睇下先。

「阿伯你仲有無咩野問題？」珍妮問。

「小姐，其實妳可以叫我做輝爺。」我同佢講，唔知點解我比其他人叫阿伯係無所謂，就係唔想比珍妮叫我做阿伯，因為佢叫得好難聽。

「……勉強都可以咁叫你嘅。」咩叫勉強都可以啊，呢個女仔真係打得少ＷＯ。





「你幾時會比個仔睇啊，因為如果過幾日都無你消息，我仲要比其他人睇。」珍妮話。

「好快，妳幫我ＨＯＬＤ住幾日先。」我答完後，珍妮露出左一個難以置信嘅眼神，「阿伯，你識講英文架？」

「識講有咩出奇啊，仲有，頭先講左，唔好叫我阿伯，叫我輝爺。」我再強調多次，而佢都好敷衍咁應我。

「係，我仲有一件事想妳幫我。」我呢句一出，珍妮就話：「仲有，你咁煩架。」

「妳地信耶穌唔係好鐘意幫人架咩。」我講左呢一句後，珍妮又露出果種敷衍嘅眼神，「快Ｄ講嚟聽下啦。」

「我想妳幫我個朋友搵多份工。」「咩話！？你朋友？同你一樣咁大架？」我剛剛講完，佢就已經咁問。

「佢再大我少少。」「仲要大你少少！？我唔知搵唔搵到架ＷＯ！」珍妮講野真係好直接。

「我知妳得嘅，妳咁好人。」我話。





「唔係架，要睇情況架，不過見係你，幫你留意下囉。」呢個囉字真係十足而家Ｄ港女ＦＥＥＬ。