[年齡無界限] 就係咁，我最近出席好多喪禮: ２８　珍妮之約

張開眼……見到嘅係自己床上面嘅天花，果幾塊每日都見到，好似就快跌落嚟嘅落漆，我尋晚，係點樣返屋企架呢？

上左年紀真係唔應該飲咁多酒，唔止頭痛，仲會周身骨頭，好似比人打左一身咁。

慢慢走左落床，見到枱面上面有一碗送涼左嘅……唔知係咩嚟，仲有腕下面放住嘅一張紙。

輝爺，尋日你同阿爸，仲有蔡老闆飲到好醉，醒左記住整熱碗解酒茶飲　細路祥字

原來尋日係細路祥送我返嚟，睇佢所寫，佢仲應該送埋另外兩個添。





而家仲有呢ｄ後生真係唔話得。

整熱左解酒茶飲果陣，再細心ｄ睇一睇頭先嘅字條，見到右下角仲有一堆字，不過寫左係一堆花紋上面所以有ｄ難睇。

戴返副老花眼鏡睇下係咩先……喔，原來係阿然嘅聯絡方法，正當我想加入我電話入面嘅時候，有一個我電話ＬＩＳＴ入面無嘅號碼打左入嚟。

邊個嚟架呢？

「喂？」





「阿伯啊，你上次未話想幫個仔搵工嘅，我搵到一份唔知佢有無興趣啊。」係一把女聲。

「等等，妳係……」我仲疑惑緊。

「阿伯你有老人痴呆啊，上次你搵小段搞身後事果陣，未同我講過你想幫個仔搵工嘅。」我記得呢把女聲拿，係個位好無禮貌嘅珍妮。

而且佢呢兩句對話，都真係好無禮貌下。

「喂，小姐，我上次係搵小段傾我嘅身後事要點做，唔係叫小段幫我搞身後事，唔該妳講清楚少少。」





「未一樣，都係搞姐。」

真係比呢個珍妮激死……

「咁阿伯你會唔會有時間聽下份工係做Ｄ咩啊？定你想約埋你個仔出嚟聽？」唔知點解，總係覺得呢個珍妮講野嘅語氣好刺耳。

「我聽左先啦，要我約個仔都唔知要約幾耐先約到佢。」我答佢。

「咁好啦，一陣一點見，我一陣ＳＤ個地址比你，拜拜。」我都未答個好字佢就收我線。

咩而家Ｄ後生做野真係咁急架咩？佢又知道我識得開佢ＳＤ出嚟嘅野？不過好彩我識開，如果係其他老人家，可能佢地真係唔知點開，又或者收到都唔知道。