[年齡無界限] 就係咁，我最近出席好多喪禮: ２７　豐高偉績

等左一陣，我地要等嘅人終於到左，「蔡老闆，嚟左啊。」阿然把聲雖然老左好多，但係我都聽得出佢係阿然。

蔡老闆一聽到阿然把聲，即刻好開心望住聲音嘅來源地，「阿然！咁夜啊！你睇下我帶左邊個嚟見你！」

阿然望住企左係蔡老闆旁邊嘅我，諗左一陣，然後開懷大笑衝去我度攬實我話：「死仔！好耐無見拿！」

「我都幾十歲人，仲叫我死仔你有無搞錯啊。」我笑住回應佢。

「又係ｗｏ，你都咁老，我應該叫你做……死老野！」佢大笑咁話。





「係啊！彼此彼此啦！」我講完呢句後，都好用力攬住左佢。

友誼，可以留幾耐？小學果陣識嘅朋友，到而家仲有無聯絡？中學呢？大學呢？有無一ｄ係為左友誼而留低嘅記錄？就算係一封信，就算係一組電話號碼，又或者係一張相，一件小玩意……

友誼，可以留幾耐？總記得果一句友誼永固嘅成語，總記得果一首唱友誼萬歲嘅歌，更記得嘅，係而家呢一刻，我三個大男人企埋一齊，大笑但流左少少眼淚。

因為，友誼，真係可以留好耐……好耐……就算好耐無見，一見返，果一份感情都唔會變少。

幫阿然佢收舖後，我地三個就去左飲野，「阿仔你去唔去啊？」





「唔去拿，你地三個咁多年無見，一定有大把野傾，我係度阻住你地唔係幾好嘅。」呢個細路祥真係幾識做人。

「真係？」阿然話：「你驚我阻住你去搵女朋友咋？」

細路祥聽到阿然咁講，紅都面晒唔好意思咁話：「……未理咁多啦……走拿。」我地三個就係佢身後笑。

我地三個去左一個大排檔度，叫左幾個菜同大啤，睇嚟，今晚會好盡慶。

「為我地三個再見返面！飲杯！」呢一下碰杯，就好似將一切唔開心嘅野都化走，蔡老闆雖然一直講自己而家咁窮嘅野，不過，佢已經無今日第一眼見佢果一種落寞，相反地，佢臉上掛住左一樣野。





「記唔記得我地果陣，公司剛剛開始，我地三個日夜趕工，仲要訓公司添啊。」可能，四圍嘅人見到我地三個老野係度想當年，都會嗤笑我地係度賣弄自己嘅經歷。

「係啊，仲有一個星期不眠不休呢。」但係，又邊會真係有人會在意其他人嘅諗法，去到我地呢一個年齡，最值錢，同埋最自豪嘅，就係我地以往嘅豐高偉績。

再唔會理自己係咩野身份，再唔會理自己而家身處咩野地方，更加唔會理自己幾大，只會記得，我地三個嘅人生曾經嘅相聚，分離，再相聚。

有咁樣嘅緣份，其實，真係好難得。