[年齡無界限] 就係咁，我最近出席好多喪禮: ２３　尊嚴與勇氣

係深水埗舊區呢度，有好多人都同蔡老伯一樣，每日都要靠拾荒過日子，佢地用自己所剩餘嘅勞力去為自己嘅生活，成日都遭受到其他人嘅白眼，而且果ｄ人仲會叫ｄ小朋友要努力讀書唔好學呢ｄ人，唔係大過就會好似佢地咁。

但果ｄ人有無諗過，佢地都只係為左生活先放低自己嘅自尊做呢ｄ事，有幾多人會明白人生面對呢ｄ關口，係好難有勇氣作出呢ｄ選擇。

我同蔡老闆走到一間茶餐廳，入到去，蔡老闆用一個好期待嘅表情望住餐牌，但係呢個表情好快就無左，佢講左一句，「貴左咁多嘅。」

係我地眼中可能貴左嘅係一兩蚊，但對於佢地嚟講，可能已經好多。

「唔駛就住ｗｏ，都話呢餐我請。」我講完後，就叫左個侍應過嚟，點左一ｄ蔡老闆鍾意食嘅野，而點菜期間佢都有話：「你仲記得我鍾意食ｄ咩。」





「緊係啦，我記性不嬲都好好。」我話，然後問佢：「飲唔飲啤酒？」

佢好尷尬咁吱唔左一下，然後我就話：「咁耐無見，一定要飲返兩杯。」

講真，計起上嚟我同佢都有成三十幾年無咁樣食野，我記得對上一餐，係公司停止運作嘅日子，姐係公司嘅最後一日，果陣所有同事走嘅已經走晒，得返我、另一位兄弟以及蔡老闆。

「估唔到，最後都係撐唔住。」蔡老闆好黯然咁話。

「傻啦，今次撐唔住唔關我地事，我地都做晒要做嘅野啦。」我另一位兄弟話。





「係囉，唔好咁，我買左支酒同ｄ野食，好好係呢度食我地最後嘅一餐。」臨別在即嘅野食，特別好食，果日我地三個笑談風生，但係今日，蔡老闆臉上面一ｄ笑容都無。

菜到，我倒酒比蔡老闆，佢好客氣咁同我講唔該，「客咩氣啊，我地都咁熟。」我講完後就自己幫自己倒滿左酒，「咁耐無見，飲杯。」

我地碰杯後，飲左一啖酒，啤酒嘅涼氣另我地身心舒暢。

「係呢，你而家做緊ｄ咩？」蔡老闆問。

「無啊，我退左休，拎住ｄ退休金，慳住用都夠過活嘅。」我答佢，而佢就點一點頭，「咁未好囉，我就係無貯蓄，搞到臨老無錢用，真係搵個錢刮過沙都無。」佢講笑咁話。





「咁其實可以問政府拎架。」我話，而佢就講：「傻啦，我仲有手有腳，仲靠到自己唔拎呢ｄ野。」

就好似我之前咁講，人生入面如果到左要放下尊嚴嘅時候，係好難有勇氣作出呢個決定，蔡老伯有勇氣選擇去執紙皮，但係就無勇氣去選擇拎綜援……可能，唔係因為勇氣問題，係佢覺得自己仲可以靠到自己。

呢樣，係尊嚴嘅問題。