[年齡無界限] 就係咁，我最近出席好多喪禮: ２４　埋單

人老左真係唔飲得多，飲左兩杯已經夠，而蔡老伯都停晒手，我見仲有咁多菜，就話：「蔡老闆，仲有好多野食ｗｏ。」

「唔拿，我呢幾年都無食咁多野，夠飽已經得拿。」佢口雖然咁答我，但係佢見到一臺嘅野食，流露左一種不捨嘅眼神。

「咁不如打包佢地，等你第日可以拎嚟食啦。」我話：「如其拎去掟，不如掟入自己嘅肚仲好啦。」我都無再等蔡老闆嘅反應，叫左個伙計比左外賣盒我，將食剩嘅野夾到盒入面。

「咁……真係多謝晒啊，有食有拎添。」蔡老闆話。

「多咩野謝啊，我同你相識咁耐，就唔好講咁多呢ｄ野啦。」整理好晒後，埋左單，見仲有ｄ酒，我就同蔡老闆繼續吹水。





「係呢，你仲記唔記得阿然啊？」蔡老闆話。

「更係記得啦，我地果陣三兄弟拍住上，不過呢幾年都好少見拿。」我答佢。

「我上次見過佢啊，佢好似係附近開左個夜冷舖，有少我拎到ｄ正野都會拎去比佢架。」蔡老闆講到眉飛色目，同頭先見返佢好唔同，而家係我面前講野咁有自信嘅蔡老闆，先係我以前識嘅蔡老闆。

「阿然開左間夜冷舖？我真係唔知ｗｏ，一陣帶我去睇下好唔好啊？」我問蔡老闆。

「緊係得啦，飲埋呢杯就行。」蔡老闆好開心咁話。





佢果種開心，真係打從心底嘅開心，睇得出，佢好耐無咁樣。

可能，你因為好耐都無聚舊，又可能，係因為諗返以前嘅回憶，又係嘅，我地呢ｄ老野，好話唔好聽，以前風光過，但係ｄ後生又點會知道ｗｏ，知道嘅人，可能都係果ｄ同自己年紀有返咁上下嘅人。

就好似我、蔡老闆同阿然咁，我地三個人以前嘅拼駁，得我地自己先會知道。

我拎起左飛去埋單果陣，蔡老闆難得嘅開心神情收起左，變成嘅，係一種唔好意思嘅神情，「要你請真係唔好意思。」

見到佢咁，我答佢：「傻啦，我地兩個有咩好計ｗｏ。」





「下次！下次換我請返你！」蔡老闆用肯定嘅語氣同我講，而我，就回答佢：「拿，你話架。」講真，佢而家呢個身世，點會要佢請，不過我都深深感受到佢嘅心意。