[年齡無界限] 就係咁，我最近出席好多喪禮: ２２　我唔要你ｄ錢

幫蔡老闆拉紙皮到佢屋企嘅樓下，果度，係一幢好舊嘅唐樓。

「你而家住劏房？」我問佢，而蔡老闆就搖一搖頭話：「我邊住到劏房，我而家搵到個床位住咋。」

我望住果條無燈嘅樓梯，「我幫你拎上去啦。」仲有ｄ力水嘅我一手拎起ｄ紙皮，「幾多樓啊？」

跟住蔡老闆嘅身後，睇到佢真係比以前憔悴左好多，瘦左好多，佢住係三樓，好彩都唔算高，但係對佢嚟講已經行到喘晒氣，何想而知，如果今日無我幫佢手拎紙皮上去，平時佢會行得仲辛苦。

走到佢個床位，見到嘅就只係一大堆嘅紙皮占左半個床位，一把唔係幾郁得嘅風扇，幾件衫同一ｄ好殘舊嘅日常用品。





「放邊啊ｄ野？」我問蔡老闆，而佢聽到我咁問後就走左入個床位，將已經占左半個床位嘅紙皮再推入ｄ後，「放呢邊啦。」

我睇住果剩返少少嘅位，問佢：「放係度，你點訓啊？」

「我屈住個身就訓度架拿。」佢答我。

「咁樣對你身體唔好架。」我話，而佢只有嘆一嘆氣，「我呢ｄ人，點可以奢求咁多。」

係，佢係用奢求呢兩個字，對於而家嘅佢，可能真係一種奢求。





我不自覺咁係銀包拎左ｄ錢比佢，而佢見到就話：「你傻架咩，我唔要你ｄ錢，我自己識搵，你自己用啦。」

究竟係呢ｄ時候，係未應該仲為左自己嘅尊嚴而拒絕呢？

我都明白蔡老闆份人，如果佢唔想要嘅話，係逼唔到佢，所以我用左另一個方法，「咁不如一齊去食飯？我地咁耐無見，我想請你食餐飯啊。」

蔡老闆聽到我咁講後，望一望四圍吱唔左一下，「咁……但係……呃……」

「行啦，男人老狗成個女人咁。」我扶左佢起身後就一齊去食飯。