[年齡無界限] 就係咁，我最近出席好多喪禮: ２１　重遇老闆

同小段傾完後，再吹左陣水同比左聯絡方法珍妮後就走人，一齊走出茶樓，我返屋企嘅路同佢地係相反方向，所以同佢地道別後就走左。

真係好彩，如果同珍妮同一個方向，真係驚忍唔住佢ｄ直接打巴佢。

走到巴士站等車，人無聊就係四圍望下，望下ｄ人，望下ｄ樹，望下ｄ車，等緊一秒又一秒咁過，老人家就係咁樣過日晨。

當然有ｄ老人會搵好多節目做，但係點都會經歷呢一個時刻。

亦都有ｄ老人會不停咁為自己嘅生活繼續拼駁，但係身體嘅衰老，可以做嘅野唔多，就好似珍妮所講，咁老，好難搵到野做。





所以最後老人家想搵錢，就會選擇拾荒，就好似我眼前望住果位老人家咁，睇佢年紀仲大過我，手腳慢過我，係度彎腰用盡晒力去拖身後得個幾塊嘅紙皮……

等等……點解呢個老人家咁熟口面？

我行左過去，行得愈近就愈覺得佢好面熟，直到行到佢面前，「蔡老闆？」原來係我以前打工果位老闆。

只見蔡老伯望一望我後，好尷尬咁笑左笑，無望我話：「好耐無見。」

蔡老伯係以前好睇住我嘅老闆，果陣同佢拼駁得好勁，可以話果陣佢開嘅公司有一部份都係同我以及另一位兄分闖返嚟。





但係，有時有ｄ野人算不如天算，公司因為一次世界經濟嘅問題而運行唔到，之後就好少同蔡老闆聯絡。

估唔到，今日會咁樣撞返。

我都好明白點解佢會咁尷尬笑，佢以前點都算係風光過，但係無諗過佢而家會咁。

見到佢咁，唔知點解心入面有一種唔舒服嘅感覺，「蔡老闆，我幫你。」

「唔好啦，呢ｄ野好污糟又辛苦。」佢拒絕我話，而且想推開我。





不過，我同佢都係同一樣嘅人，硬頸嘅人，「傻啦，以前同你一齊做野，你都知我咩都唔怕架。」

我一手拎住左其中一條繩，然後話：「我地兩主僕都好耐無見拿。」呢句話後，我地就無再講野，我只係專注咁拉野，而不時聽到蔡老闆嘅飲泣聲。

而我，亦都不自覺咁飲泣。

可能，係因為咁耐無見掛。

又或者係因為，見到佢而家嘅境況。