[年齡無界限] 就係咁，我最近出席好多喪禮: １８　奇怪的女孩

步出靈堂後，聽到後面有一段腳步聲跟住，我轉過頭一睇，係小段。

「輝爺，如果你真係對份計劃書有興趣，可以搵我傾傾。」原來係為左生意，不過經過福伯嘅喪禮，我覺得呢位後生仔唔係一心為左錢去做呢一個行業，所以就話：「我會搵你，但係你比我睇清楚份計劃書先。」

「好。」小段向我微笑左一下，然後叮囑我話：「輝爺，你記住用左吉儀入面嘅一蚊，因為帶返屋企唔吉利架。」

我將福伯喪禮嘅吉儀拎左出嚟望一望，「明白。」然後我地兩個互相點一點頭後就各自離開，佢返去靈堂幫手，而我就去升降機大堂。

而係升降機大堂，我又見到頭先果位女仔，原來佢頭先只係走左出嚟，無離開過呢一度。





我望住佢，而佢察覺到我望住佢後，就問：「你望咩野啊？」

「頭先係福伯嘅喪禮到，我地見過。」我話，然後佢就答：「唔好意思，呢一間殯儀館入面所有嘅喪禮我都出席晒，想問邊個係福伯？」

聽到呢個女仔講嘅野後，我先醒起頭先小段話係好多唔同嘅喪禮上都見到呢個女仔出現，而家ｄ年輕人又會咁怪嘅，有咁嘅興趣都有。

我望住佢果一副充滿敵意嘅眼神，無再理佢，升降機到，我好心等埋佢，但係佢就同我講：「唔駛拿，我等下一架。」

而家ｄ後生真係無咩禮貌。