[年齡無界限] 就係咁，我最近出席好多喪禮: １７　喪禮的尾聲

同小段傾計嘅期間，福伯果兩個孫行左過嚟，佢地望一望我就問：「請問你係未輝爺啊？」

我見到佢地兩個雙眼都係通紅，「係。」我對佢地兩個點一點頭。

而小段都好識做行開左，而福伯兩個孫就話：「我地兩個成日都聽爺爺講你ｄ野架，佢話係公園度，好少人會坐足成日聽佢講野，你係唯一一個唔覺得佢煩嘅人。」我聽到佢地兩個咁講後，笑左一笑話：「你地爺爺又真係好多野講。」

「嗯，以前爺爺真係好多野講架，但係當佢多左病痛之後，就好少同我地講野，我地兩個好鍾意聽佢講以前ｄ故仔架。」兩個孫仔分別坐係我左同右邊。

「你地一定好錫爺爺。」我話，而佢地望住福伯張相，「因為爺爺都好錫我地。」淚流落嚟已經好似變左佢地兩個嘅習慣一樣，二人都無意慾擦走，我望一望福伯張相，就問：「呢張相係邊個㨂架？」





「係我地兩個。」孫仔話：「好記得我地兩個果日拎住爺爺張相去沖曬舖，我地兩個真係喊到收唔到聲，個店員見到我地喊成咁都嚇親。」

「係啊，果日真係喊到講唔到野。」孫女話。

而我再望一望福伯張相，呢張相入面嘅福伯，佢笑得好開心，「呢張相，你地兩個揀得好好。」

係呢一刻，無啦啦有個奇怪嘅諗法，唔知到我走左果日，放係度果張車頭相會係點呢？又會係邊個幫我揀呢？

「好拿，我都要走拿。」我同福伯兩位孫講：「你地都要好好照顧自己同睇住你爸爸媽媽。」





「知道。」福伯呢兩個孫真係生性。

「請上前行禮，一鞠躬、再鞠躬、三鞠躬，家屬謝禮。」跟隨著禮儀司嘅說話，我對福伯作出最後嘅道別，臨走前，我記起福伯以前同我開過嘅玩笑，「我諗我只可以同你鬥早死，呢樣我先有把握嬴你。」估唔到，到最後佢呢個笑話真係成真，我望住佢笑得好開心嘅相，現後講左句：「係拿，你贏左，我呢次輸到喊。」眼淚不自覺滑落，就算係只有一滴，都已經好多。