[年齡無界限] 就係咁，我最近出席好多喪禮: １９　阿伯，你就死拿？

經過福伯呢一次突然嘅離開，我對「人真係好化學」呢一句更加之肯定，雖然我地呢ｄ已經上左年紀嘅阿伯一定會咁諗，但係當發生左始終個心都硬係有ｄ野。

我無主動將福伯嘅離開話比公園ｄ朋友知，都係等佢地問，我先會講，因為好事就四圍講姐，呢ｄ野，無謂唱通街。

每位朋友聽到福伯走左都覺得好突然，人生無常，不過始終都要生活，過左幾日大家都如常咁做返自己嘅野，而我都一樣，只係，旁邊果個人唔再係福伯。

每日嘅生活都好正常，隨左而家會多左留意ｄ處理身後事服務嘅資料，比嚟比去，都係小段果一份比較好，所以就打左比佢約左個時間傾。

小段一知道有客當然成把聲都變到烚熟狗頭咁，我就同佢講我仲未走，只係話定佢知叫佢幫我手搞身後事，佢聽到後都傻笑咁話當然啦。





其實對話間，雖然知道呢一單係一單生意，而小段嘅語氣都好似烚熟狗頭咁，但係我聽得出，小段內心中有一部份係出於自願幫我地呢ｄ老人家。

不過，佢果份烚熟狗頭，想搵好多錢嘅心情，我就真係點諗都諗唔到點解。

而我地兩個約左係我同福伯最後一次飲茶嘅地方，一來係想懷念一下福伯，二來係呢間嘅點心有真係好抵。

我一去到茶樓，就見到小段一早拎好位等我，而當我行近個位，我就發覺有ｄ奇怪，點解有一個女仔係度？

坐低，再望清楚個女仔，原來係果位成日出席喪禮嘅女仔珍妮。





「點解呢個女仔會係度？」我同小段咬耳仔咁講。

「我都想知啊，佢今日跟左我成日架拿，叫都叫唔到佢走啊。」小段好細聲咁回答我。

我望一望呢位女仔，愈嚟愈覺得呢個女仔真係好奇怪。

「輝爺，我地食小小野先開始講你份計劃好唔好？」小段問，而我就回應佢：「好啊。」

但係無諗過個珍妮問我：「阿伯，你就死拿？」





究竟係而家ｄ後生無禮貌，定係呢個女仔特別無禮貌呢，我諗正常人都唔會咁問人呢ｄ問題掛。

我一副無咁好氣咁望住佢話：「唔係啊，小姐，妳可唔可以坐開啊？」

「點解要坐開？」佢問。

「因為我地一陣要傾嘅野都幾重要，我唔想比妳聽到。」我答佢。

「咁都係一陣先傾，咁我一陣先坐開。」佢答完後用一副我唔想坐開嘅姿態繼續坐係度。

啊～～～我真係好想大巴大巴咁打落呢個珍妮度。