[年齡無界限] 就係咁，我最近出席好多喪禮: １６　喪禮上的女孩

望住對面嘅小段同個女仔傾計，女仔仍然係目無表情咁回應住小段嘅說話，因為隔得有Ｄ遠，所以佢地對話嘅內容我一Ｄ都聽唔到。

不過我見到，佢地傾到咁上下後，小段就比左一張卡片果個女仔，然後就走開左。

我見到小段走開，就行去果位女仔旁邊坐，然後問佢：「你都識得福伯架？」

個女仔搖一搖頭，而我又問：「咁點解妳會嚟嘅？妳識得福伯Ｄ屋企人？」

個女仔又係搖一搖頭，而我又再問：「我見小段佢比左卡片妳ＷＯ，唔通妳屋企有人走左？」





今次個女仔無搖頭，佢企左起身，行左出去，而個禮儀師就講：「請上前行禮，一鞠躬、再鞠躬、三鞠躬，家屬謝禮。」個女仔跟住禮儀師嘅說話鞠躬後就走左。

原來，走嘅時候都要鞠躬，而我就望住慢慢離開嘅女仔，佢走嘅一刻，臉上面都係目無表情。

小段出返嚟，見到我坐左果個女仔本身坐嘅位後，就問：「頭先果個女仔呢？」

「佢走左。」我答，而小段就一臉若有所失咁行到我旁邊坐低後，同我講：「果個女仔我成日見到佢，佢出席好多唔同嘅喪禮架。」

「下？點解啊？佢有好多朋友死架？」我下意識咁樣問左。





「唔係，佢係想知當一個人死左之後，Ｄ人會點樣送走果Ｄ人，因為佢想知道，如果自己走左果日，會唔會都好似其他人嘅喪禮咁。」小段同我講，我諗呢個就係佢地剛剛嘅對話。

「個女仔咁後生，就諗埋呢Ｄ野？」我問小段。

「唔知呢，頭先我問佢果陣，佢咁樣同我講，佢話，自己生存呢個世界上，不停尋找生存落去嘅意義已經好累，點解唔好好地結束。」聽到小段咁講，我而家明白點解個女仔可以咁目無表情。

「個女仔叫咩野名啊？」我問佢，而心入面就諗緊呢個女仔唔會係叫做君兒掛。

「佢叫做珍妮。」小段答我，呿，仲以為我可以睇到常在我心嘅真人版添。