[年齡無界限] 就係咁，我最近出席好多喪禮: １５　再遇小段

係福伯嘅喪禮上面，我見到果位做殯儀嘅小段，佢今日無再好似果日烚熟狗頭咁笑，佢表情嚴肅得嚟帶住點欣慰。

我行到佢旁邊坐低，而佢都會意到我坐左係佢身邊，佢望一望我點一點頭，而我都回應佢點一點頭後話：「福伯嘅喪禮，係你安排架？」

「係啊，不過真係估唔到，果日先同佢講完份計劃，第二日人就走左。」小段將本身望住福伯張相嘅目光移到我身上後，問我：「你會唔會覺得，係我當面提福伯要計劃身後事，所以福伯先會無啦啦走左啊？」

我聽到佢咁問，真係好出奇，「點會呢，呢Ｄ整定架嘛，有邊個會知。」

小段微笑左一下後話：「你咁深明大意就好，有Ｄ老人家唔鍾意提呢Ｄ架，佢地話唔講呢Ｄ就無事，一講呢Ｄ就好快應驗。」





我望住呢一刻嘅小段，佢仍然用一個好欣慰嘅眼神望住現場嘅一事一物。

「咁你做呢行未成日比人鬧？」我問，而小段又微笑左一下同我講：「有邊行做野唔會比人鬧架，做野就係咁架啦。」

估唔到呢個後生仔又幾成熟架ＷＯ。

「係呢，你有無睇我比你嘅計劃書啊？」小段問我，而我就答佢：「有睇，但我而家有Ｄ驚。」

「驚咩？」小段不解咁問我。





「驚我就快去。」我講笑咁講，而佢都回應我呢個冷笑話笑左一下，就當，係呢個喪禮入面嘅黑色幽默。

我地兩個坐埋一齊係度折元寶，而折折下小段就話：「伯伯，你知唔知點解要將Ｄ金銀紙折成元寶？」

「因為易燒Ｄ？」我亂答。

「都算係嘅，不過最主要係因為折元寶果一刻，會將你對往生嘅人嘅思念都傳入個元寶到，咁往生左嘅人用果陣，都會知道你地嘅心意。」我地將一個又一個元寶放人一個白色嘅紙袋入面，而呢一刻，係我正前方坐左一個女仔，果個女仔目無表情咁發呆望住前面，而手就不停折緊元寶，我就問小段：「咁如果好似果個女仔咁款折，應該唔會有思念傳到入元寶入面。」

小段聽到我嘅說話後，就望一望我所講嘅女仔，「又係佢？」然後，佢就企左起身話：「伯伯，我行開一陣。」





「唔好叫我伯伯，我叫輝爺。」我向佢介紹自己。

「你好，輝爺，我行開一陣先，你自便。」佢答我。