[年齡無界限] 就係咁，我最近出席好多喪禮: １４　福伯的喪禮

我坐車去到紅磡，呢一度，有好幾間殯儀館，而且附近都有好多從事殯儀行業店舖，我跟住果個男人比我嘅地址，去到指定嘅靈堂。

行到去，見到兩個大字係上面，「李府」，係呢度，門口兩邊仲掛住燈籠，係寫上左過身嘅人歲數，事後係小段口中得知，呢個燈籠上面嘅歲數，會由過身嘅人歲數加上「天地人」三歲。

步入靈堂嘅果一下，見到嘅係沉重以及愁雲慘霧，呢樣係正常嘅事，試問自己嘅親人突然離開，每個人都會係咁。

「有客到，請留步。」同我睇劇集一樣嘅對白，不過原來語氣同聲線同劇集唔一樣，禮儀師係用平和帶莊嚴嘅語氣講：「來賓請上前行禮，一鞠躬、再鞠躬、三鞠躬，家屬謝禮。」禮儀師字正腔圓念出每一個字，而我向家屬鞠躬，望一望福伯嘅屋企人……

佢話嘅唔孝順嘅仔同成日刻薄佢嘅新袍喊得好犀利，喊到出唔到聲咁，而好百厭嘅死飛仔孫仔同好多人追嘅金毛ＭＫ孫女……都唔ＭＫ同唔死飛仔，而且無染頭髮，望落佢地兩個，好似讀書仲幾叻添，當然佢地兩個都喊得好犀利。





而我鞠完躬後，就坐埋一邊幫手折元寶，就係折折下，佢個仔行左過嚟話：「輝爺你真係有心，咁遠水路都過嚟。」

「你阿爸生前同我好好朋友，所以我點都要嚟送佢一程。」我話，然後我忍唔住問佢：「係呢，你阿爸生前有同我講過住老人院嘅事……」「老人院！？我同阿爸講左好多次，就算屋企點細，我地都唔係送佢去老人院，一家人齊齊整整先係最緊要。」

我聽到佢咁講後，就話：「唔係ｗｏ，果陣我聽佢講，係因為你個女大，每個月都會嚟果ｄ野，所以想整間房比佢，先要佢去老人院……」「無ｄ咁嘅事ｗｏ。」我同佢同時望向福伯張遺照，睇嚟，佢有ｄ野瞞住我地。

佢嘆一嘆氣話：「阿爸成日同我講，話佢年紀大，係屋企無咩建樹，所以要不如搬去老人院度住，佢一咁講，我地全家人都反對，我個女更加好大反應話唔可以，阿爺係一家人，唔走得。」

我聽到佢咁講後，就話：「你個女ｗｏ……」我望一望佢個女，「佢將頭髮染返黑？」「我個女無染過頭髮。」





講到咁，我開始明白，原來一直福伯都係講緊大話……

「我兩個仔女每到星期六日，都會同佢飲早茶，就算飲唔到，佢地兩個都一定會去買佢最鍾意食嘅叉燒包比佢，我老婆都好好架，當我阿爸係佢親生阿爸一樣，阿爸一有咩周身骨痛，就會即刻帶佢去睇醫生，照顧得佢好好。」

我諗，福伯一直講嘅大話，係講比自己聽……有Ｄ老人家到某個年紀，都會有一個心態，會覺得自己無用，對世界開始無貢獻，因為佢地好明白地見到自己嘅身體機能日日咁衰弱落去。

到最後，佢就會唔想拖累自己最愛嘅人，最愛嘅家人，佢地有唔同方法處理，有ｄ就算出左事都唔會同佢地家人講，有ｄ會每日都自己過自己嘅生活，唔再過問其他家人嘅生活，亦都唔想家人過問佢嘅生活。

而福伯，就選擇左呃自己，想自己唔再相信呢個家係愛佢，但係，當佢每日返到呢個屋企，見到最愛錫佢嘅仔、對佢如自己父親嘅新袍，好孝順佢嘅孫仔孫女，佢跟本呃唔到自己，就算呃到晏就成日出嚟呻嘅佢，一到夜晚返屋企，接受到佢地嘅溫暖後，跟本呃唔到。





我將福伯講嘅野講左佢知，佢個仔只係笑左一句：「我阿爸真係傻，佢一生為我做左咁多，用一生去養大我，佢又點會無用ｗｏ。」

我望一望佢同佢家人，睇得出，佢地真係好愛錫福伯。