[年齡無界限] 就係咁，我最近出席好多喪禮: １３　聽日見……

同平日一樣，我又返到果個公園，又係我最早一個到，我係果部手部運動機做運動，等緊，一個又一個老人家嚟到。

捉象棋、玩十五胡、吹水……棋逢敵手嘅我、旗開得勝嘅我，點解今日總係覺得少左ｄ野咁嘅？

吹水啊……點解今日唔見福伯嘅？唔通佢自己去左老人院度？無理由架，佢話過如果再去，應該會叫埋我。

我就係公園到，等左一段時間，都等唔到福伯返嚟，今日，無講到果句「聽日見」，我就走左。

另一日，又係咁……





再過左幾日，都係咁……

而再過多幾日，有一個４０幾歲嘅男人出現左係我地嘅公園度，佢逐個逐個老人家咁問，終於，問到我：「唔好意思，你係未叫輝爺啊？」

突然間比人咁樣一問，我都唔知點嘅反應，呆左呆後答佢：「係啊，我係啊，你識我架？」

我問返佢後，佢嘆左口氣同我講：「我阿爸成日係我面前講你架，佢話同你好好朋友。」

「你阿爸？邊個係你阿爸？」我問，而佢就好凝重咁答我：「我阿爸，叫福伯，佢上個星期過左身。」





突如其來嘅消息，不停咁侵襲我嘅大腦，「唔係掛！我上星期先同佢去飲完茶！」可能你地會覺得我好激動，但係呢ｄ消息，無論你聽到幾多次，都會有呢一種反應。

「係真架。」個男人同我講，而且佢仲眼濕濕咁話：「有日佢返到嚟，手拎住左一份善終嘅計劃書，同我講左以後想點樣安排，我仲話佢做咩無啦啦要講呢ｄ野，佢就笑笑口話自己都唔細，點都有一日要諗下，然後食完飯，沖左涼，睇左陣電視就入返房訓，第二朝佢就醒唔返……」佢講講下，都開始喊。

而我，就嘆左一啖氣，一啖好大啖嘅氣，真係好大啖，唔會嘅話唔可以將我心入面嘅唔開心妤發出嚟，我望一望呢個男人，然後問佢：「佢幾時會設靈？」

個男人回答我：「再過兩星期。」

「比個地址我，到時我想去鞠個躬。」我話。