[年齡無界限] 就係咁，我最近出席好多喪禮: １０　小段

唔知點解，其實係我一入嚟到而家，就覺得有個人一直係暗中望住我地，係未我嘅錯覺呢，但直到而家我要走嘅呢一刻，我都覺得有個人望住。

「輝爺，你覺唔覺得有人望住你咁啊？」原來唔係自己嘅錯覺，福伯都覺得係。

「我都覺啊，可能呢度唔乾淨。」我答福伯，但估唔到比佢話返轉頭話：「傻啦你，呢度老人院有人做清潔架，乾淨過你屋企。」

下……我嘅乾淨意思同你嘅乾淨意思，好似有ｄ出入ｗｏ。

唔理咁多，已經拎左資料就快ｄ走，不過係我地就走到門口之際，有個後生仔突然殺左出嚟，手中拎住左一份唔知咩野，大字形咁擋住我地嘅去路。





而果位後生仔，烚熟狗頭咁笑，睇嚟佢都係不懷好意。

「兩位年輕人……」我地兩個咁老你都可以話我地係年輕人，呢個人好人有限，「有無ｄ時間聽下一ｄ你一生中最重要嘅事呢？」望落呢位年青人，把聲又幾似唱歌幾好聽果個陳奕迅，但望落佢個樣，就似唱「如果我是陳奕迅」果條打壞，唔記得叫咩……ＭＲ咩呢，唔記得個姓係咩添。

「一生中最重要嘅事，咁就要聽下拿。」係我仲諗緊果位ＭＲ咩之際，福伯已經答左佢，真係阻都阻唔到，位後生仔聽到佢咁講，就拉左我地兩個行埋一邊坐住，然後係佢個袋入面，拎左兩份釘左卡片嘅計劃書比我地。

我望一望本計劃書，上面寫住嘅係「心安理得一條龍式善終服務」……喔……原來係做殯儀嘅，估唔到會有呢ｄ人嚟安老院都搵生意ｗｏ，我望住呢個後生仔，然後話：「你都幾醒目ｗｏ，嚟到安老院呢度搵生意，但點解唔去死亡登記果ｄ地方搵啊？」

呢位後生聽到我嘅說話後，笑住答我：「過獎拿，我呢ｄ食腦架嘛，死亡登記我朝早會去，不過晏就通常會去老人院，拿，唔係我自吹自擂，搞善終呢ｄ野，除左要有個善良嘅心外，就係要醒目，你地睇下我。」佢咁講後，我同福伯都好認真咁望住佢個樣。





而過左陣，佢就話：「你睇下我，我根本就係善良加醒目嘅像徵。」我聽左呢句就反晒白眼，而福伯聽到呢句就一個真係信嘅樣話：「咁就要你呢位後生仔幫我拿。」

呢個後生仔又烚熟狗頭笑住話：「無問題，我講下呢份報告先。」

我就無咩心機聽佢吹水拿，而後生仔都察覺到我唔想聽，所以只係一直落力咁ｓｅｌｌ比福借知道，我就自己翻下份報告，望一望佢嘅卡片，原來呢個後生仔叫小段，咁未同陳奕迅拍嘅果套電影，「常在我心」一樣名囉。