[年齡無界限] 就係咁，我最近出席好多喪禮: ９　濃妝大嬸

我地到左一間唐樓嘅前面，呢一幢唐樓應該有裝修過，因為係外面望落都幾齊整，而且個大門係自動玻璃門，睇嚟開呢間老人院嘅人都有用心咁裝修呢ｄ門面野。

咁又係嘅，如果外表唔搞返好少少，都唔會吸引到我地呢ｄ老人家……邊個話老人家唔可以貪靚架，不過我地只會為左一ｄ值得貪嘅野上面。

福伯一見到呢間老人院，就話：「環境好似幾好ｗｏ。」

「都係架，入去問問？」我問佢。

「都好，快ｄ入去啦。」佢好似急不及待想入住呢度咁。





行到去果個應該係櫃臺嘅地方，我地問果個化濃妝嘅大姐，「阿嬸啊，呢度係未有房比我地呢ｄ老人家住啊？」估唔到福伯你咁直接，一開聲就話人地係阿嬸。

你地都知道女人架啦，最鍾意就係聽大話，福伯咁直接嘅說話比呢位化濃妝嘅大姐聽到，位大姐就即刻瞪住佢話：「阿伯，你老花就戴返眼鏡啦，我咁都叫阿嬸嘅話，呢個香港就無後生女架拿。」

呢位大姐，你ｄ自信又幾大架ｗｏ。

福伯聽到呢位大姐嘅說話後，笑住幾下話：「係啊，今日唔記得戴老花眼鏡啊，整到睇野唔係幾清楚，係呢靚女，妳呢度係未有房啊？」

聽到比人稱呼靚女後，呢位大姐嘅心情當堂好返晒，笑笑口問：「你有幾多人想住啊？」





福伯呢個時候望一望我，而我就直接咁講：「你自己想住，唔關我事啊。」

「咁就我一個人啦。」福伯話。

「位呢，唔係話無，我地有分大、中、細房，你本身自己嘅野多唔多架？」大姐問。

「都係得幾件衫，幾箱野咁囉。」我地呢ｄ老人家，本身自己嘅野真係唔多，值錢嘅野一係放係銀行，一係就比自己親人睇住。

大姐聽到福伯嘅說話後，就話：「咁其實中房就夠架拿。」





「中房就得架拿原來，好啦咁就中房啦……」「喂，你咁快拿主意，唔駛諗清楚同問清楚咩？」我見福伯好似趕住入住咁，就話。

「我咩都唔識問，真係唔知有咩問題可以問ｗｏ。」福伯傻笑咁話，而我就無咁好氣理佢，幫佢問：「你地有無咩野服務，又或者註冊姑娘，陪睇醫生果ｄ野架？」我點都有上網搵過，所以都知少少識問，而我問左呢個問題後，個大姐就露出左一個麻鬼煩嘅表情，拎左幾張Ａ４紙比我話：「你想知嘅野住部係晒上面，等你地諗好左之後再返嚟話我地知啦。」

我接過張紙後，仲想問幾句，但佢已經好唔耐煩地話好唔得閒叫我自己睇。

真係呢，呢度老闆真係多得妳係度趕客啊大姐。

「咁我地睇過張紙先啦，輝爺，睇完先再返嚟煩呢位靚女啦。」福伯，你唔係真係想住呢度掛。