[年齡無界限] 就係咁，我最近出席好多喪禮: １１　去茶樓飲茶

福伯呢個人，真係人講咩就信咩，小段講完個計劃書後，福伯就答：「好，如果我死左嘅話，我一定搵你。」唔係掛，你死左嘅話仲搵到佢。

小段聽到佢咁講後，果回答仲搞笑：「咁就真係多謝晒你拿福伯，我一定等你嘅電話。」嘩……而家ｄ後生仔工作嘅拼勁真係強。

「咁……呢位年輕人意思又……」佢呢ｄ問左又好似唔係問題嘅問題，我直接答：「我而家未有呢個諗法，等我有呢個諗法嘅時候先再算。」

「咁你都記住打電話比我拿，我都一定等你嘅電話架。」呢句野咁似小段同頭先嘅福伯講嘅。

從老人院走出嚟後，睇睇錶，頭先咁樣一傾原來用左個半鐘左右，見時間仲可以去多間老人院睇，我就問福伯：「駛唔駛去多間睇啊？」





「唔駛拿，呢間幾好啊，我拎ｄ資料返去睇一睇後，想再嚟登記就話你知拿。」佢望一望對面嘅馬路，見到一間茶樓，「原來對面就係茶樓，真係好，以後去飲茶行去對面就得，真係方便。」佢笑笑口咁話，而我見到左下午茶時間，就話：「咁不如我地入去飲個茶好唔好啊？」

「又得姐，以後我入嚟呢度住嘅話，你都可以日日嚟搵我去茶樓飲茶架。」福伯笑住講。

「要坐車先飲到茶咁煩，我先唔要。」我答返佢。

過到對面，間茶樓又真係唔錯，冷氣夠，野食中規中矩，最緊要係價錢合理，我地呢ｄ老人家，好話唔好聽，無收入得份生果金，咩都要度住洗錢，剩返貯返果ｄ，都係想死果陣搞得好好睇睇，訓入一副好ｄ嘅棺入面，唔好失禮。

飲茶果陣，我再次拎起頭先小段比我嘅計劃書，我係未應該認真咁睇下呢，自己都有返咁上下年紀，今日唔知聽日事，更有可能下一刻，無啦啦跌一跌就會去……





「點啊，對份計劃有興趣？頭先你有唔聽，扮晒野。」比福伯窒添，我傻笑左一下後，聽到，「叉燒包～」「呢度要一籠。」我叫，然後再同福伯講：「食野啦，你最鍾意食嘅叉包啊。」

「好好好。」福伯笑得好開心咁話。