[年齡無界限] 就係咁，我最近出席好多喪禮: ７　全港老人院資料庫

我拎左部電腦係張象棋枱上面，同阿福伯睇緊，「呢個網勁啊，可以搵到晒全港嘅老人院，佢話。」我後補多句戴個頭盔先。

「網上世界真係咩都有。」係我旁邊嘅福伯大開眼界咁話。

講真，我真係好鐘意Ｄ人係我面前用一Ｄ大開眼界嘅目光望住我用電腦，雖然而家識用電腦嘅老人家都有好多，但係每次有人見到都會好似見到稀有動物咁。

我好鐘意呢種與眾不同嘅感覺。

「係架，呢個網站，簡真就係老人院版嘅ＯＰＥＮＲＩＣＥ。」我又特登用左Ｄ佢地唔識聽嘅詞語。





「咩嚟架？食得架？」福伯問，佢又問得幾搞笑，ＯＰＥＮＲＩＣＥ某程度上都算係食得嘅。

「問咁多做咩，我揀幾個比你地睇啦。」我用我熟練的手腕揀左幾間老人院出嚟，然後慢慢分析比福伯聽：「呢個網可以根據唔同嘅要求搵出你想要嘅老人院，好似價錢啦、樓宇類型啦、單人房雙人房、你行動方唔方便、駛唔駛覆診等等，就好似呢間咁，就講呢間老人院係咩野棲宇類型。」

「樓宇類型係？」無啦啦有另一位阿伯走左過嚟。

「姐係唐樓、中層樓宇等等果Ｄ。」我答。

「咁有無話附近有無酒樓果Ｄ架？」又有另一位老伯問。





「有架，呢度就有講。」我用手指住已經比我放到好大嘅字，老人家老花，睇字緊要要大Ｄ啦，「佢呢度就講附近有街市同酒樓。」

「有聽過有Ｄ老人院無認可護士架。」又多左位老伯聲。
「係架，呢度都有講埋。」我繼續答。
「但係，我信教，有無Ｄ係有教會架。」今次係一個阿婆。
「都有。」我望一望四圍，幾時圍左咁多人過嚟架，「咩事睇睇下咁多人。」

「無，見你講到個網咁勁，未想見識下囉。」其中一個阿伯拎住副棋話：「睇完未啊，阻住左張象棋枱啊你地。」

「你好趕時間咩？」我反問佢地。





「咁又唔係，話一話你聽等你得個知字姐。」個阿伯回答。