[年齡無界限] 就係咁，我最近出席好多喪禮: ６　一齊搵

福伯同平時一樣，不停係度講屋企Ｄ野，玩牌又講，捉棋又講，做親Ｄ咩都不停咁講。所以話佢點樣唔會成日玩牌都輸先得架，因為佢都唔專心。

佢每次咁講，都會眼有淚光，但係無喊，而我亦都同平時一樣，只係充當一個聆聽者係佢身邊，聽佢講野，適時嘅話就應下佢。

就咁樣，好快就日落，就係我要走過陣，福伯就話：「你可唔可以同我去睇下Ｄ老人院啊？」

我轉一轉個身望住福伯，笑左笑話：「講呢Ｄ，聽日再慢慢同你搵啦，而家大家各自歸家。」

老人家生會就係咁，咁樣又一日……





返到屋企，我面對住四面牆，果部成日都會壞嘅電視，仲有果把一開就好嘈嘅風扇。係，佢地係舊左Ｄ，但我唔捨得扔，話晒佢同我都一樣，有返咁上下年紀，扔佢地未姐係扔左我自己。

不過我屋企唔係得呢Ｄ古老人架，我有一部手提電腦，用嚟上下網，睇下ＥＭＡＩＬ　同ＦＡＣＥＢＯＯＫ……就咩用咁嘅眼神望住我，老人家唔比有ＦＡＣＥＢＯＯＫ　架，我Ｄ朋友嘅數目可能仲多過你地班宅男添啊，而且，而家Ｄ後生都話ＦＡＣＥＢＯＯＫ剩係得老人家用，如果你都用緊嘅話，我地都係咁高咁大咋。

望住部手提電腦，我決定聽日帶去同福伯搵下香港有Ｄ咩野老人院岩佢心水，搵定一Ｄ資料聽日同佢講先。

去ＧＯＯＧＬＥ打左「老人院」做ＫＥＹ　ＷＯＲＤ，第一條紀錄係一個叫做全港老人院資料庫，咁把炮，好，就等我呢位老人家入去睇你有幾多資料先。