【英雄系列4】神盜俠侶: 13
13.
翌日，我等一行三人就坐上內陸機，前往波圖
由於葡萄牙只係響西班牙旁邊，所以搭飛機都只係需要一個幾鐘
再響機場租車，去到市中心已經係12點，彪叔就提議食埋野先去聖保羅教堂
「阿德，misa，今次我地行動要小心d」食緊葡國菜既時候，彪叔咁同我地講
「吓，點解呀？」
彪叔飲住咖啡:「今次比斯利的紅石比我地偷左，迪拉斯公司一定留意到，甚至...可能已經從拍賣會既cctv鎖定左我地」
misa問:「其實...呢個迪拉斯公司係咩黎架？」
「迪拉斯，表面係一間國際級既私人保安公司，負責d會議、展覽既保安工作...實際上，佢不停做埋d非法勾當，殺人、綁架有錢佬...只要係有利可圖既就會做」
「咁點解IID唔一早消滅呢個組織呀？」我問
「因為迪拉斯既規模好大，而且有傳背後既負責人，係某幾個大國既大臣，所以我地IID都唔敢郁佢」
迪拉斯似乎好神秘，不過我地依家既目標只係拎到呢筆聖人遺產，所以少理為妙
misa將未開既茄汁放入袋裡
「你做乜鳩呀？」我問
misa反駁，仲塞左幾包落我恤衫袋度:「咁..食得唔好哂嘛！你都幫手袋d先啦！」
唉，失禮死人咩
食飽後，我地就正式出發，去聖保羅教堂
「聖保羅教堂，係全個葡萄牙最大既教堂，每年都有成幾百萬旅客黎參觀架」彪叔為我地擔當嚮導
「彪叔，你黎過葡萄牙架？」我問
「十幾年前黎過啦，果陣岩岩結婚，同老婆黎度蜜月，哈哈呢d陳年舊事都係唔好講啦」
misa:「咁..你老婆呢？」
「佢響兩年前有cancer，走左啦..」彪叔平靜地點起香煙
「唔..唔好意思呀..對唔住呀彪叔，我唔知..」misa知自己講錯野，馬上道歉
「哈，唔緊要..我都睇化左啦」彪叔吸住煙:「你地兩個呀，要珍惜眼前人呀，唔係實會後悔架」
由飯店行左十分鐘，終於到聖保羅教堂
果然係一座非常宏偉既建築，雖然外表非常殘舊，但依然充滿氣派
「不過..點解d入口封左既？」
彪叔打開手機:「係喎...唔記得左上個月有新聞，話聖保羅教堂需要維修，要關閉3個月」
「咁依家...只可以偷入去姐，總無可能空手而回掛」我道
「嗯！」
由於無可能響鬧市中偷入去，所以我地只好周圍搵下有冇其他入口
「就咁睇google街景，除左正門之外，響後面橫街仲有一個比神父入既入口，去碰下運氣啦」彪叔真係足智多謀
果然，響後方既橫街有一道生鏽既鐵門，似乎係通去教堂內部
彪叔一邊開門一邊講:「小心..可能隨時會比人埋伏..記得拎定麻醉槍」
我同misa拎出衫袋中既麻醉槍，準備隨時迎擊
門後既係一條昏暗既通道，一滴風都欠缺，空氣中亦夾雜住沙塵
「嘩，咁污糟既！」misa掩住鼻
「通常開緊工既地盤係唔會冇燈照住d通道，空氣仲要咁唔流通，唯一既可能性係..」
彪叔既猜測同我一樣:「根本冇維修，只係有人想夾硬封左佢，而果個人就係艾比度拿華斯」
misa問:「咁..點解佢要封住個教堂呀？」
「佢應該係唔想有其他人意外搵到呢一筆聖人遺產，所以佢就響拍賣會前後既呢段時間封左教堂，等真正拎到比斯利的紅心既人先至發現到」
到底呢個艾比度拿華斯打緊咩如意算盤呢...
入到教堂既中心位置，果然同我跟彪叔既推測一樣，內裏根本冇維修工程進行，而且仲保持住良好既面貌
「睇黎我地估得岩啦，不過..要點樣先搵到下一個線索呢..」
我地三個四周圍睇，都冇發現到d類似秘道既野
「照計應該總會有d線索比我地睇下架喎..」彪叔道:「就算冇..都會有d位開機關既姐」
misa忽發奇想:「係喎！不如試下..依家再照返粒紅石丫！」
「做咩呀misa？尋晚咪照過囉..」
「唔試點知得唔得既姐！」
「misa既建議都可以試下既..」彪叔拎返條頸鍊出黎，再用紫外光燈照射
但，依然只顯現左經緯度
「喂，唔掂喎...」
「咪住！粒紅石出現左新既字啦」彪叔細心解讀:「係葡萄牙文黎，將太陽之力、紅之心和十字架連成一線..」
「嗱，都話我醒架啦！」misa得意洋洋道
「你狗屎撞馬棍姐，你估你真係醒咩！」
「好啦好啦，我地快d諗下呢句野點解先啦」彪叔苦笑道
「紅之心就係解紅石啦..」misa推測:「咁太陽之力..就係解做陽光？」
「咁點連成一線呢..」
正常苦惱之際，我望到教堂地下中央有一個大型十字架坑紋
而外面既陽光，剛剛好透過屋頂射落十字架中心
「喂！！！！試..試下將條頸鍊放響陽光上面！」我情急下大叫
「哦...原來係指地下果個十字架！」彪叔隨即將頸鍊既紅石放上十字架中既陽光
「隆隆隆隆隆隆隆隆隆隆隆隆隆隆」
幾秒後，響我地面前既地板馬上打開，現出一條通往地底既通道
「阿德你都幾醒架喎，哈哈！」彪叔笑讚
misa扁住嘴:「哼，負碌到你丫！」
「吹呀，快d落去tim呀！唔係天黑都搞唔掂」