【英雄系列4】神盜俠侶: 11
11.
我同彪叔行近會場一角既出口附近
「根據酒店既平面圖，呢度應該就係通往電掣房既唯一通道...但係要密碼卡先入到去」彪叔分析住:「不過每個員工都有一張密碼卡..阿德...」
「知啦，我偷一張就得啦..」
我將目標放響右邊捧住酒杯既酒店員工上
經我觀察，佢既密碼卡係放響後袋，咁就易辦啦
我先以一記左肩側撞埋身，兼且引開佢既注意
再用右手迅速將密碼卡偷入西裝褸既內袋
「sor..sorry！」
「de nada..」員工十分有禮貌地回應我
「嗯..落手夠快，唔怪得發叔向我推薦你地啦」彪叔笑一笑
「過獎啦..」
我同彪叔襯住冇人見到之際，偷入到門後
而門後既通道殘舊非常，同外面豪華既裝修截然不同
「阿德，跟住我行啦..」彪叔細細聲講，我只好點頭回應
根據andphone中既地圖顯示，由門口入去，要經過4個轉角位先去到電掣房，途中仲要經過保安室
我同彪叔貼牆慢行，慢慢行到保安室外既通道
保安室外有一塊大玻璃，粗略估計保安室內有十幾人，佢地全部蛇緊王
「好彩..班食蕉全部都玩緊啤牌，我地趴落地下穿過佢啦」
彪叔先過，而我就跟住彪叔尾，用metal gear式既磨地方法橫過
「咔！」仆街，放響褸袋入面既andphone跌左出黎
裏面既保安聽到聲，都即刻停低唔玩啤牌，準備行出黎
「阿德，行快d啦」彪叔用口形提醒
我執起andphone，行快爬行
同時，保安室既腳步聲亦越黎越近
「咔！」
彪叔一手將我扯到轉角位，剛剛好冇比開門既保安睇到
個保安確定冇人之後，再次入返去
「好彩姐..阿德你下次小心d啦，我救唔到你好多次架，哈哈」
「唔該彪叔....彪叔你手力都好勁喎，一野就可以扯我埋黎..」
彪叔笑笑口:「咁都係我平時有做gym姐...你得閒都操fit d啦，咁樣misa實仲冧你啦！」
「你..你up乜呀？」
彪叔:「你睇唔出咩，misa佢...唉到電掣房啦，做左正經野先啦」
屌，都唔知彪叔想講乜
去到通道既盡頭，就係電掣房，又要鎖匙先開到
「放心，呢個交比我啦」彪叔拎出一個萬字夾
「咔..咔..咔..」
「彪叔，乜萬字夾開鎖真係work既咩？」我問
「緊係得啦，你只要慢慢屈到佢同個鎖一樣彎就得架啦」
「咔！」門鎖似乎已經打開
入到去，就只係一個普通既電掣房
「但係問題就黎啦...邊個先係大廳既電掣呀..」彪叔摸摸頭笑道
「咁好簡單姐..」我逐個配電箱睇:「宴會廳理應係一間酒店用得最多電既地方，只要我開著panel搵返邊個用最多電流，果個就係大廳」
彪叔:「咁勁既你？你做呢行架？」
「嗯，我以前係做工程師...」
如果我當年冇炒鳩老細，大概呢世人都冇機會黎西班牙..
「無錯啦，係呢個」我指住正中間既配電箱:「一陣你將個掣扭返正佢既話，成個大廳就會無哂電力供應」
「果然英雄出少年，冇左你我都唔知點算，哈哈！」彪叔拍拍我膊頭:「咁阿德你依家返去先，如果一陣輪到比斯利的紅心拍賣，你就用andphone聯絡我啦」
我跟返頭先既路線返到大廳，當然途中更加小心啦
「喂，misa」我行埋misa既身邊:「依家咩環境呀？」
misa撥弄自己既秀髮:「岩岩拍賣會開始左，但仲未見比斯利的紅心....頭先無危險丫嗎？」
「無..係差d比保安見到姐，嘩無啦啦咁關心我既，嚇死人咩！」
misa指吾以對:「我..我不嬲都關心你架啦！」
「哈...係咩..」
「依家就黎到今晚既壓軸環節，就係拍賣比斯利的紅心！呢條頸鍊前主人就係已故西班牙富翁艾比度拿華斯」主持人高聲大叫
其後，一個放住比斯利的紅心既枱就被推出黎，在場既人無一不為此歡呼
呢條比斯利的紅心晶瑩剔透，紅玉反映住燈光，非常閃亮
即使我唔識睇呢d收藏品，都已經知道佢係貴野黎
「彪叔，目標出現啦，好彩既係外面冇箱裝住，我同misa可以落手」我用andphone向彪叔匯報
「好，咁一陣由你地黎發號施令，到時我就即刻熄燈」
「600萬」
「650萬」
「700萬」
「1000萬！！！1000萬1次！1000萬2次！1000萬3次！恭喜費南迪斯先生，投得比斯利的紅心！」
響在場既掌聲下，呢位年紀老邁既費南迪斯先生向各人點頭
不過唔好意思啦，比斯利的紅心始終都係屬於我地
依家所有人既注意力都去哂費南迪斯先生度，正正就係落手既好機會
「彪叔，準備禁掣」
「好，三、二、一...」
「嘭！！！！！！！！」
響一瞬間，大廳既玻璃天幕被打碎
接住既，係一個身穿身穿黑色緊身衣、戴住lace mask既身影從天幕既破爛處游繩落黎，將比斯利的紅心搶走！
「Lo Siento！比斯利的紅心係屬於我架啦！」
「你..你係..？」受驚既費南迪斯先生用英文問
「My name is black milky！」呢個black milky對住我既方向飛吻:「Adios！」
我認得佢既笑容，係美雪！