我每星期都會去摩星嶺同佢啪啪啪: 三十二

【上文提及】
行到去廢堡，我見到Alex同Aurona，跟住我決定企埋一邊偷聽佢地講嘢⋯⋯
Aurona：「下？你咁講即係阿文嘅血種喺DNC度？」
Alex：「係！」
Aurona：「咁點解佢之前喺Dream Zone俾鬼攞走血種嘅時候你唔提佢？」
Alex：「提佢？你唔好忘記咁耐以嚟佢做過啲咩！佢而家面對嘅一切都係報應！等左咁耐終於有機會可以親眼睇住佢死，你要我救返佢？冇可能！」
Aurona：「你咁做同阿文有乜分別？我唔可以睇住你變成下一個阿文⋯⋯」

【我每星期都會去摩星嶺同佢啪啪啪 - 三十二】
下⋯⋯我有冇聽錯呀？我嘅血種留左喺DNC？



一剎那，我個腦湧出無數個問號，究竟而家係發生緊咩事？個故事明明應該係我成功攞返Aurona、Kenson、傻仔西佢地嘅血種救返佢地，之後就大團圓結局！究竟Alex講嘅嘢係唔係事實呢？如果係嘅話，點解佢要睇住我中伏都唔提醒我？點解佢要親眼睇住成死？我而家面對嘅一切係報應又係咩意思？

我已經冇辦法再扮無知咁忍落去，趁Aurona喺度，我而家就要捉住Alex問清楚！

但係當我諗住衝出去要Alex解釋清楚成件事嘅時候，佢地兩個已經走左。而就算我繼續留喺呢度都冇咩可以做到，所以我決定都係落返山先，其他嘢⋯⋯之後再算啦！

自此以後，我嘅生活總算慢慢回復正常，亦睇住Kenson、傻仔西佢地一日比一日精神，唔再好似以前咁頹咁殘。可能係因為經歷呢件事之後我真係大傷元氣，我嘅身體狀況好似冇以前咁好，就算我前一晚幾早瞓都好，第二日返學上堂嘅時候總係覺得好攰好難集中精神，之後有一晚仲因為咁同屋企人嘈⋯⋯

文媽：「阿仔，你自己睇！啲成績又差左啦！我同你講左幾多次呀—夜晚早啲瞓，唔好成日出夜街，第二朝先有精神聽書㗎！」


文：「媽，我呢排晚晚都十二點前就上床瞓啦！你都知㗎！」
文媽：「係，但係你成日夜晚點幾兩點就走出去，次次到第二朝四五點先返！乜你以為可以呃到我咩？」
文：「我幾時有試過凌晨走出去呀⋯⋯」
文媽：「得啦！唔洗再講啦！你自己知自己事！」

無緣無故俾人咁冤枉我，有一刻我真係想問下我阿媽係咪痴左線。同佢嘈完之後，我已經冇心情再打機，於是比平時更早執嘢瞓教。

——————————————————————

一睜開眼，我望一望部電話—1:16am！夠鐘出去啦！



我行落屋企樓下截左架的士，上車之後就同司機講：「摩星嶺」

架車行左一大段路之後終於開始上山，之後司機開始聊我傾計⋯⋯

司機：「細路，咁夜仲去摩星嶺嘅？你係住喺嗰頭㗎？」
文：「嗯！」
司機：「而家啲後生仔真係⋯⋯咁夜先返屋企，都唔洗讀書嘅！細路，你夜晚返屋企小心啲呀！我啲行家話呢頭夜晚好邪㗎！附近仲有個墳場喎⋯⋯」
我冇應佢，只係繼續靜靜咁坐喺架車度。

司機：「到啦，五十二蚊！」
我冇攞個銀包出嚟，只係趁個司機拎轉面嗰陣好快咁用隻左手捂住佢嘅口同鼻，而右手就叉住佢條頸⋯⋯

p.s. 都真係好耐冇出過文，因為之前一直都好忙。老實說講，突然抽時間繼續寫落去主要係因為最近又有學生自殺。好多時聽到呢類新聞都真係會影響到自己嘅心情，而令我更心酸嘅係—2018嘅第一個星期都未過就⋯⋯
無論如何，希望大家可以多D留言同關心身邊人！



生命熱線 2382 0000
香港撒瑪利亞防止自殺會熱線 2389 2222