我每星期都會去摩星嶺同佢啪啪啪: 三十

【上文提及】
唔知點解，我竟然會喺廢堡入面瞓左，到我醒返之後我就即刻攞住Aurona、Kenson同傻仔西嘅血種離開廢堡。雖然諗真啲都有小小唔妥，但係我又記唔起啱啱有冇發生過奇怪嘅事。點都好啦，我都係快啲出去先，反正有Alex喺度一定唔會有事嘅
⋯⋯

【我每星期都會去摩星嶺同佢啪啪啪 - 三十】
將三支血種袋好之後，我就即刻行返去樓梯嗰邊。而家仲有十分鐘多啲，我只要落返三層就可以出到廢堡，之後再跑出條山路⋯⋯行快幾步嘅話應該都夠時間嘅⋯⋯
我一心諗住快啲離開，完全冇懷疑過點解自己會咁熟悉廢堡，就連去返個出口係要落幾多層我都知⋯⋯

我越行越急，個心越跳越快，我實在唔想再留喺呢個咁絕望咁黑暗嘅空間。我諗極都唔明，究竟係邊個同埋點解要搞啲咩DNC同Dream Zone呢啲咁恐怖嘅嘢出嚟，根本就係名乎其實嘅「收買人命」。



沿着山路出到摩星嶺，我已經見到Alex喺前面迎接我⋯⋯
Alex：「阿文！你⋯⋯你終於返出嚟啦！你知唔知你入左去Dream Zone嗰陣我有幾擔心你呀！」
文：「講呢啲⋯⋯咁我而家咪平安冇事行返出嚟囉！」
Alex：「係呢⋯⋯你⋯⋯記唔記得⋯⋯啱啱喺Dream Zone入面⋯⋯有冇啲怪事發生呀？」
文：「做乜講嘢吞吞吐吐咁？我知！你想串我我啱啱瞓著左呀嗎！我知我係7左小小，不過呢排忙住搞joint-school啲嘢唔夠瞓所以先忍唔住抖下姐。」
Alex：「哦⋯⋯係囉，我就係想講呢樣囉！」
文：「仲講？我地快啲去救左Aurona先啦！」
我諗住繼續向前行嘅時候，Alex就叫停左我⋯⋯
Alex：「咪住呀文，我地分頭行事啦，你將Aurona嘅血種俾我，咁你咪可以快啲去救你嗰兩個friend囉！」
文：「你仲心急過我喎！反正我都唔知要點做，不如我地一齊去救左Aurona先啦！」


Alex：「好簡單，你將啲血種倒入去針筒度然後好似打針咁打入佢地手臂就得㗎啦！咁簡單唔洗睇我做一次啦，你而家就去幫佢地打左先啦！」
文：「算啦，其實可以唔L理佢地，因為佢兩條友一到夜晚就潛曬水，所以佢地可以收一收皮先。」

不過真係多得Alex提起Kenson同傻仔西我先記得要搵個機會幫佢地打返血種。我喺what$app group度約左佢兩個聽朝返學之前去ig pier，至於到時要點做⋯⋯就聽朝先算啦！
Alex：「咁⋯⋯一係你早啲返去抖下先啦！你啱啱喺廢堡都攰到瞓左啦！」
文：「Alex--你由啱啱開始就不斷趕我走，又催我去搵Kenson同傻仔西又叫我快啲返去抖--乜你真係咁想我走咩？定係⋯⋯你有嘢瞞住我唔想俾我知所以就瘋狂搵藉口叫我走呀？」
⋯⋯