我每星期都會去摩星嶺同佢啪啪啪: 二十九

【上文提及】
我一路行就隨意拎起啲test tube，望一望之後再用力掟落地，無論Alex點樣叫停，我都冇理佢，直到我攞起Aurona嗰支--
文：「Alex，呢支嘢入面裝住嘅就係你想要嘅血種，如果我唔小心放手，哈哈--」
⋯⋯

【我每星期都會去摩星嶺同佢啪啪啪 - 二十九】
Alex呢個時候突然喺我面前出現。
Alex：「停手呀！你究竟知唔知自己喺度做緊咩架？係你自己講架--你話你一定會擺返Aurona嘅血種出嚟救返佢架！你點可以用呢樣嘢嚟威脅我架？」
文：「唔洗講得咁難聽喎，我幾時有威脅你呀？再講，如果你真係咁有料嘅，一早就搶走左我手入面呢支嘢啦！」
Alex：「你搞左咁多嘢出嚟，老老竇竇你究竟想點？」


文：「我究竟想點？應該係我問你究竟想我點！成件事由一開始都係你喺度吹水洗我腦，我一直都信你，仲好內疚自己搞到Aurona咁。但係當我一路行入嚟Dream Zone，我開始有一種好熟悉嘅感覺，就好似返左屋企咁。」
Alex：「你真係俾DNC影響得太緊要啦！你已經俾佢地攞左你啲血種㗎啦！清醒下啦！」
文：「清醒？我就係入左嚟廢堡呢度先清醒！我知道你一定有野瞞住我，你咁耐以嚟從來都冇提起過我失憶嘅事！」
Alex：「我冇同你講係因為⋯⋯咪住，你咁講⋯⋯即係你知道左？」
文：「自從我行緊入Dream Zone突然間頭痛嗰刻我已經開始懷疑，直到入到嚟廢堡呢度竟然有一種好熟悉好親切嘅感覺，我就更加肯定自己個腦入面係深藏左一段記憶。」
我舉高手入面嘅血種，等Alex可以清楚咁望住Aurona嘅血種。
文：「所以搞咁多嘢嘅目的得一個--我想你幫我唤醒返我唔記得左嗰段記憶。」
Alex：「阿文，你聽我講，咁耐以嚟我做嘅每一件事都係問心無愧，我做嘅所有嘢都係有目的架！」
我一拳打落隔離個木櫃⋯⋯
文：「梗係有目的啦，而且一定唔係啲見得光嘅事！」


Alex：「唔係咁㗎！你誤會左我啦⋯⋯」
文：「誤咩會呀？由始至終你只不過當我同我班friend係你嘅玩具，好有可能我地三個會唔知點解走上去摩星嶺「過節」都係你刻意安排嘅。」
Alex：「我⋯⋯喺呢個moment我真係唔知講咩。」
文：「唔知講咩？點解唔反駁我呀？咁即係我講中左啦！」
Alex：「阿文，其實我都唔想重施故技，但係你知道咁多嘢對我嘅計劃係一啲好處都冇⋯⋯」
Alex講完之後，我手中嘅test tube竟然慢慢飄左去Aex度，同時我亦開始覺得個頭痛到想爆炸。成日有人話女人生仔十級痛，咁我而家頭痛嘅程度應該係有幾條女喺我個腦入面生緊仔⋯⋯

屌，我竟然喺廢堡度瞓著左，好彩仲未過半個鐘。咦，點解有幾支喺地下嘅？我拎起嚟望望--係Aurona同Kenson仲有傻仔西佢地㗎喎！
文：「Alex！你聽唔聽到我講野呀？我搵到啦！」Alex把聲又喺我個腦入面響起：「咁就好啦！你快啲出返嚟啦！」
不過講真都有小小唔妥，我竟然喺廢堡入面瞓著左，但係又記唔起啱啱有冇發生過奇怪嘅事。點都好啦，我都係快啲出去先，反正有Alex喺度一定唔會有事嘅⋯⋯