我每星期都會去摩星嶺同佢啪啪啪: 二十六

【上文提及】
喺我入去Dream Zone之前，Alex淨係話俾我知要去廢堡，之後我就再聽唔到佢把聲。我等左一陣之後就決定自己出發入Dream Zone先，但係行喺山路度跑左一陣之後，我嘅情緒就開始唔穩定。

【我每星期都會去摩星嶺同佢啪啪啪 - 二十六】
就當我想不顧一切咁大叫發泄嘅時候，一把熟悉嘅聲音又再一次喺我腦入面出現--
「清醒啲啦阿文！如果連你自己都咁容易受Dream Zone嘅負面磁場影響嘅話，你隨時連自己條命都保唔住，更加唔洗諗住可以攞到血種救返佢地三個！」
呢把聲⋯⋯
文：「Alex？係咪你呀Alex⋯⋯我真係唔知應該點做，我⋯⋯我好憎自己呀！我問自己點解要連累身邊嘅人⋯⋯佢地三個⋯⋯佢地三個係無辜㗎！」
「清醒啲啦阿文！如果連你自己都咁容易受Dream Zone嘅負面磁場影響嘅話，你隨時連自己條命都保唔住，更加唔洗諗住可以攞到血種救返佢地三個！」
--同一段説話、同一把聲音，又再一次喺我腦海中響起，無論係語速嘅快慢、音調嘅高低，都同之前嘅一模一樣，就好似個腦入面俾人裝左部錄影機咁，不斷喺度重播緊某段錄音⋯⋯



重播緊？
清醒？
血種？
無辜？
點解⋯⋯呢啲係咪啲咩keywords？點解呢幾隻字會不停喺我個腦入面轉嚟轉去？我個腦好痛好痛，就好似有幾千枝幾萬支針由腦海深處飛插出嚟咁，我感覺到自己應該係唔覺意喚醒左某段被封鎖嘅記憶⋯⋯
我痛到成身冇曬力咁坐左喺地下度，雙手發曬狂咁亂抓自己嘅頭髮--當我越係努力去諗返嗰段遺忘左嘅記憶，我個頭就越痛。但係無論如何，我都係記唔起究竟發生過乜野事。

或者係因為所承受嘅痛楚太大，令我個人開始回復理智。既然我始終都係load唔到嗰段記憶，點解唔可以就咁由得佢繼續忘記呢？況且而家我仲有啲更重要、更趕急嘅嘢要做。重新調整過呼吸之後，我開始慢慢放鬆，痛苦亦都開始減輕。我慢慢企返起身，繼續向前行，一心諗住要攞返啲血種！



再行左一陣，我開始見到一大片空地，而再前小小就有一大座黑色嘅嘢幢左喺度--冇估錯嘅話，嗰座應該就係廢堡！今次入嚟嘅路程比之後短左好多，同之前Kenson同肥仔西入Dream Zone嘅情況一樣，咁我就更加肯定自己真係入左Dream Zone冇去錯。雖然呢度比較空曠，能見度比山路入面高啲，但係我行每一步之前都好小心咁留意住周圍有冇異樣，亦都唔夠膽拎部電話出嚟開燈亂照，以免俾人⋯⋯或者係俾鬼發現。

就係咁，我一步一步慢慢移動到廢堡面前。過程比我想像中順利，暫時都冇遇過任何俾鬼嚇俾鬼追嘅場面。我覺得，應該係Alex暗中出手幫我，不過，呢個只係我自己一廂情願嘅諗法⋯⋯