我每星期都會去摩星嶺同佢啪啪啪: 二十五

【上文提及】
根據Alex嘅估計，DNC一直喺背後控制住Dream Zone同入面嘅所有嘢，而且佢地亦發現左Alex喺度暗中調查緊。因為咁樣，我更加要儘快入Dream Zone搵返Aurona，Kenson同傻仔西嘅血種，救返佢地。

【我每星期都會去摩星嶺同佢啪啪啪 - 二十五】
一路行去Dream Zone個入口出面嗰條山路，我就一路同自己講--唔洗驚喎阿文，咁小事點會難到你……
不過無論點樣安慰自己，我始終都係淆底到手震腳震，好似柏金遜症發作咁。

「阿文，聽唔聽到呀？我係Alex呀！」
我即係拎轉頭，諗住係Alex改變主意，決定陪我入Dream Zone，但係我就一個人（應該係一隻鬼）都見唔到。
文：「我聽到呀，但係見唔到你嘅？你喺邊？」


我講完之後，Alex把聲又出現……
「你係見唔到我㗎，因為我只係透過腦電波將聲音傳俾你，一陣如果我留意到你有危險我都會用呢個方法提你。Anyways你而家聽住先，啱啱唔記得同你講，你一陣入左Dream Zone之後就直接去廢堡……Aurona……Aurona?」
文：「Alex？咩事呀？Alex？」
點算？唔通佢地兩個出左事？我係咪應該返落去睇下？但係越遲入Dream Zone可以救返佢地嘅機會就越渺茫……

企喺Dream Zone出面，我一直等待Alex把聲再一次喺腦入面響起，但係時間一分一秒咁過去，我就越嚟越緊張。望住部電話，18:55……18:57……18:59……
妖，唔L等啦！而家已經夜晚7點，繼續企喺度都只係浪漫時間。我用力吸左口氣，同自己講：屌！死就死啦！之後我就衝左入條山路度。

印象中呢段山路都要行成三十幾四十分鐘先去到Dream Zone同入面座廢堡，所以我更加要把握時間，快啲跑上山。一路沿住條山路跑上山我就一路喘氣，除左係因為跑到好攰之外，我個腦仲不斷replay緊Kenson同傻仔西喺廢堡俾女鬼搞嘅畫面……
我企左喺山路度，呢刻真係好想有人可以走出嚟同我講--所有野都只不過係一場夢，但係當我望住眼前呢條又黑又靜嘅山路，再加上嗰陣灰白色嘅濃霧同急促既呼吸聲，我就已經覺得好絕望。呢種恐懼嘅感覺太真實，呢種無助嘅感覺太熟悉。唔知點解，兩行眼淚就咁樣湧左出嚟，無論我幾努力咁嘗試去控制自己嘅情緒，都係徒勞無功。



點解？點解會發生啲咁嘅事？點解我要自己一個去面對？如果有得揀嘅話，我寧願就快要死嗰個係我，最起碼我可以繼續一無所知咁過埋剩低嘅日子。我對住個天大叫：「對唔住呀！如果你地三個有咩事嘅話……都係因為我……都係因為我！」
……