我每星期都會去摩星嶺同佢啪啪啪: 二十七

【上文提及】
我行緊入Dream Zone嘅時候，個腦就不停喺loop住一句說話，而且仲好似喚醒左某段遺忘左嘅過去，但係我就始終記唔起係咩事，於是，我就繼續趕入Dream Zone。我覺得，應該係Alex暗中出手幫我，我先可以順利咁行到廢堡面前，不過，呢個只係我自己一廂情願嘅諗法⋯⋯

【我每星期都會去摩星嶺同佢啪啪啪 - 二十七】
仲有大約15分鐘⋯⋯

企喺廢堡前面，我一路同計住自己用左幾多時間，一路喺個心入面同自己講--入去啦仲等咩呀？
雖然係咁，我始終踏唔出第一步。呢個時候，部電話嘅電筒突然著左。我好緊張咁想熄返佢，怕會吸引到啲鬼過嚟，但係個mon就touch極都冇反應。
文：「屌！快L啲熄L左佢啦仆街！」
一唔小心，部電話就跌左入廢堡入面，內置嘅電筒仲熄埋。


文：「嘩唔L係咁邪呀⋯⋯唔好自己嚇自己，冇嘢嘅冇嘢嘅！應該係Alex催我快啲入廢堡搵血種！冇錯，一定就係咁！」
我一邊嘗試安慰自己，一邊就慢慢行入廢堡，同自己講只要入去攞返部電話就即刻去搵血種。
但係要搵返部電話睇嚟冇想像中咁易，廢堡入面黑到乜都睇唔到，連向前行都唔容易，更何況要搵電話。雖然行左入廢堡，但係我都只係企左喺個入口度唔敢亂郁。理論上部電話應該就唔會跌得好遠，所以我踎低，雙手貼地咁摸下摸下，同時細細步咁向廢堡內部移動。

慢慢咁郁左一陣之後，我同廢堡嘅入口已經有一段距離。突然間，我感覺到地下好似有啲震，開頭只係好輕微咁震下，但係過左幾秒就越嚟越嚴重，好似真係地震咁。雖然我唔知發生咩事，但係我腦入面唯一嘅諗法就係--走！我望返去廢堡嘅入口，室外射入嚟嘅光慢慢由下而上咁變得昏暗，好快就連一絲嘅光線都冇埋。之後，啱啱劇烈嘅震動亦都停止左，亦喺呢個時候，我感覺到有啲嘢撞左落個肚度。我攞上嚟摸一摸--係我部電話！唔知算唔算好彩，咁樣就俾我搵返部電話，我開著個電筒照下⋯⋯

屌！
呢度究竟係邊度？點解周圍有咁多咁高嘅櫃？入面咁多一支支紅色嘅係咩？
我慢慢企返起身，用電筒照住眼前嗰排木櫃仔細望清楚。呢度啲櫃嘅擺位同圖書館好相似，一排排整齊咁擺左喺度。每個櫃嘅左上角都有個label，上面寫住一組數字，應該就係日期。而櫃入面就有好多類似test tube嘅物體，裝住啲紅色嘅嘢--有啲嘅顏色就比較鮮豔，似血紅色；有啲就好深色，喺咁昏暗嘅環境睇同黑色冇乜分別。



「呢度就係我地擺放血種嘅地方。」一把聲喺背後響起。
文：「哦⋯⋯唔該曬Alex。」
⋯⋯
咪住！呢把聲⋯⋯唔係Alex！
咁即係⋯⋯
文：「呀！！好痛呀！快啲停手！救命呀！」
我淨係feel到有嘢插左入我後面，之後就好攰好攰，成個人冇左知覺⋯⋯