我每星期都會去摩星嶺同佢啪啪啪: 六

【上文提及】
喺廢堡入面，我揾返Kenson同傻仔西，而且仲遇到三個成日嚟呢度嘅女仔，佢地分別係Catsy，Natalie同埋細芳。由於大家都係中學生（加上又係靚女喎），我地好快就熟落左。雖然暫時總算可以短暫咁坐低抖下，但係我始終都係解釋唔到啱啱上山嗰陣嘅怪事。
 
【我每星期都會去摩星嶺同佢啪啪啪 - 六】
大家一齊坐喺度吹水，我就一路擺出一個「明明行左入男廁，但係點解得廁格冇尿兜」嘅樣喺度沉思。呢個時候，Kenson終於忍唔住出聲。
Ken：「頂你仲諗乜呀！成件事好簡單，我地五個行過嚟嗰陣都冇野，係得你唔知做乜L野兜左成個幾鐘先行到過嚟，咁好明顯係你hi左嘢啦！完！」
Nat：「其實都唔出奇呀！呢頭間唔中都有啲鬧鬼嘅傳聞㗎啦！我地都聽唔小。」
Cat：「算啦！而家你見返我地證明已經冇事啦！咁就唔好再諗頭先嘅野啦！」
諗諗下佢地都講得啱嘅，再慢慢研究啱啱嘅事的確冇而家嘅處境冇乜用。
 


講講下，我開始覺得出面好似落緊雨咁，不斷有啲雨水撇入嚟。
芳：「睇嚟啲消防嚟左啦喎！」
Cat：「咁就行啦，唔好再坐喺度啦，我唔想一陣又成身濕曬。」
Catsy望住我地，講完之後就企左起身，我地六個就一齊行返去樓梯嗰邊。
Nat：「我地會上二樓，你地都跟埋一齊啦！反正啲消防而家喺出面淋緊水你地而家走出去實濕曬！」
去到呢一刻，我只係想即刻離開呢個名乎其實嘅「鬼地方」，但係咁辛苦先揾返Kenson同傻仔西，我梗係唔會再獨自行動啦！我望住Kenson同傻仔西，睇下佢地諗住點。
Ken：「Natalie都講得啱嘅，而家出去實成身濕曬。既然係咁，不如我地都跟埋一齊上去啦！」
睇見Kenson同傻仔西笑淫淫咁樣，我都估到佢地唔會咁易放過呢個溝女嘅大好機會。
 
於是，我地六個開住電筒慢慢向住二樓進發。


西：「係呢！點解要上二樓嘅？」
芳：「你地三個未上過去呢？」
文：「未呀！我地第一次嚟咋，邊似你地咁有經驗。」
Cat：「雖然呢座嘢係好耐之前起嘅，但係上面間左幾間房，仲有埋廁所，成層示範單位咁。」
有冇咁誇張呀？一座荒廢左唔知幾耐嘅堡壘竟然俾Catsy講到好似毫宅咁，我聽完都唔係幾信，但係佢咁講反而令我有小小期待樓上究竟係點樣嘅。
 
「呀！」
上埋最後一級樓梯，我唔知撞左埋去啲乜嗰度，成個人失左平衡向後跌返落樓梯個U-turn位度。
文：「頂！痛L死我！」
我成個人坐左喺度，呢一刻我個腦淨係浮現出數之不盡嘅粗口。我嘗試自己企起身，但係就痛到完全郁唔到。雖然坐喺度抖返十幾分鐘我應該可以自己起返身行上去，但係我實在唔想自己一個留喺度，何況佢地發覺小左個人都會嚟揾我，反正都7開有條路，不如快啲叫佢地嚟幫手。


文：「喂！Kenson，西，我仆左街起唔到身呀！你地落返嚟幫下手！」
.
.
.
.
.
.
等左一陣，都冇人應我，我大聲啲再嗌。
文：「傻仔西，Kenson，你地嚟幫下手啦！我仆左街起唔到身呀！」
.
.
.
.
.
.


過左成分鐘有多，佢地都冇應過我，而且亦冇落嚟。我就自己一個，繼續坐喺樓梯間……