我每星期都會去摩星嶺同佢啪啪啪: 五

【上文提及】
喺摩星嶺山頭上面，我突然間遇到山火。場火燒得好旺，雖然我走左入廢堡度暫避，但係報唔到警始終冇用。正當我以為自己必死無疑嘅時候，竟然收到之前失散左嘅Kenson同傻仔西嘅what$app，話佢地就喺廢堡嘅一樓。我上到一樓，見到前面冇幾遠嘅地方有五個身影喺度……

【我每星期都會去摩星嶺同佢啪啪啪 - 五】
雖然唔知前面有幾多個人（或者幾多隻鬼），不過既然已經上左嚟，我決定都係要行過去睇下。拎住支電筒越行越近，我個心就跳得越厲害。而前面嗰幾個身影可能係sense到有人行緊過去，亦都企左起身。

突然間，一道光照埋嚟……
「文，真係你啊！」
把聲好熟，係Kenson把聲。佢見到我之後就熄返支電筒。



西：「太好啦！終於都揾返你！啱啱行行下唔見左你差D嚇死我地！」
望住Kenson同傻仔西，呢一刻，我真係開心到想喊出嚟。
文：「咦？佢地係……」我一臉疑惑咁望住坐左喺隔離嗰三個女仔。佢地應該就係「多出嚟」嗰三個身影。
Ken：「佢地係Catsy，Natalie同細芳，佢地三個都係好似我地咁嚟呢度「過節」㗎！」
文：「噢......」
我望一望嗰三個女仔，然後禮貌地都同佢地打聲招呼。但係去到呢刻我都仲未可以放心住。
文：「出面場山火燒得好勁，我地留喺度都只係避得一時......」
西：「我地知呀！Catsy已經報左警啦！」
呢個時候，Catsy都出聲。
Cat：「你唔好睇小呢座野啊！佢係殖民時期英軍用左一大筆錢起嚟做軍事用途㗎。我敢講就算成個山頭焼曬呢座野都唔會有事呀！」


芳：「得啦，你history拎硬5**啦，唔洗再曬自己有幾勁啦！」
Nat：「放心啦阿文，我地三個成日嚟呢度㗎，而且都唔係第一次撞正山火，只要留喺度一定唔會有事！」
佢地講到自己咁有經驗，我都唔好意思反駁，更何況靚女嘅說服力係大啲嘅。
就係咁，我竟然毫無顧慮咁相信呢三個識左唔夠五分鐘嘅人，而我地六個人就坐左喺廢堡度吹水。

文：「啱啱真係唔好意思，淨係諗住有山火，都冇正式自我介紹下。我叫阿文，同佢兩個同班嘅。」
芳：「哦！唔怪得你地好似好熟咁啦，原來同班嘅……」
Cat：「哈哈！咁我地三個同你地都幾似喎！我地都係中五，雖然唔同班，不過都係讀$t. $tephen’s Girls College」。
呢個時候我心諗：個世界真係細，就算係困住喺摩星嶺山都可以撞到名校出身嘅靚女，真係啱曬我地三條毒L。可能係出於男士嘅天性，對於佢地三個靚女嘅出現，同埋佢地所講嘅一切，我完全冇質疑過。



Ken：「係呢阿文，你啱啱究竟去左邊？點解行行下唔見左你嘅？」
文：「你仲好意思問喎？我一直跟住你兩個行，點知你兩條友就越行越快，叫都叫唔停喎！」
西：「點會啊？我地完全都聽唔到你叫我地，而且我地由青年旅舍入山路開始就一路慢慢行，仲諗行得咁慢你實跟到……」
Ken：「咪係囉！原本諗住八點九就行到嚟，點知嚟到都差唔多成九點。」
文：「九點？！」
冇記錯嘅話我地應該八點半度經過青年旅舍。
文：「即係你地行左冇半個鐘就到？」
Kenson同傻仔西微微點頭。
Catsy就用奇怪嘅眼光望住我：「有唔妥咩？我地每次嚟都係行廿分鐘咁上下就到。」

有唔妥咩？梗係有！明明過左青年旅舍之後條路就冇任何分叉嘅，我地個個應該都係行緊同一條山路，大家嘅步速又應該差唔多，點解我會用多左成個鐘先行到嚟？中間究竟發生左咩事？同啱啱行行下Kenson同傻仔西貌似撞左鬼咁又有冇關係？我真係完全冇頭緒……