我每星期都會去摩星嶺同佢啪啪啪: 七

【上文提及】
我同Kenson、傻仔西、Catsy、Natalie、細芳坐喺廢堡一樓嗰度吹水嘅時候，消防亦都到左喺出面救緊火。為左唔好整濕自己同埋把握呢個溝女嘅大好機會，我地三條on9仔決定跟埋班女上二樓繼續互相溝通交流下。點知臨上完樓梯嗰陣，我唔知撞到啲乜，成個人跌返落一二樓中間個U-turn位度。我坐喺度嗌左Kenson同傻仔西幾次佢地都冇應我，亦冇返轉頭幫手。

【我每星期都會去摩星嶺同佢啪啪啪 - 七】
嗰兩條衰仔真係夠兄弟，顧住溝女連我仆街都唔理。不過冇理由呀，就算佢兩個唔理我，嗰三個女仔都唔似係嗰啲見死不夠嘅人，可能呢啲就係所謂嘅知人口面不知心。坐喺度乜野都做唔到真係悶到人都癲，我忍住痛喺褲袋扲部電話出嚟諗住睇下ig解下悶同時分散下注意力等自己冇咁痛。
「妖，乜料呀仆街，咪開L左數據囉，又做乜L野refresh唔到呀！」
可能係太痛所以個人嘅耐性都差啲，當我睇見連ig都load唔到嗰陣真係小左出聲。但係冷靜返落黎再睇真啲我就明發生咩事--唔好話數據，部機連訊號都收唔到。我嘗試舉高部電話好似啲低能仔咁喺半空中fing下fing下，但係無論我做乜都好，都係一格訊號都收唔到。冇得用電話，我唯有繼續坐喺度，等到冇咁痛先再起身。

等左十幾分鐘，我終於覺得好返啲，慢慢企返起身。企左喺度抖左一陣，我開始試下逐步逐步行上樓梯。吸取左上次嘅教訓，今次我一路淆住底，一路用支電筒照清楚地下先慢慢咁踏隻右腳上二樓。奇怪嘅係，明明眼前就乜野都冇，但係就好似有幅隱形牆起左喺度咁阻住我上去。無論我係舉高雙手想穿過幅牆，定係用個頭企圖去撞爆幅牆（諗返轉頭我都唔明點解自己會咁白痴），我都係以失敗收場嘅。呢刻嘅我就成個戲子咁喺幅隱形牆前面摸下摸下咁，真係想話自己唔on9都唔得。



搞左十幾分鐘，我開始想放棄嘅時候，我突然被二樓入面嘅情況嚇親，同時我終於明白點解佢地五個一直冇嚟揾我。
「一、二、三、四、五……六！？」
上面總共有六個身影。

透過用電筒微弱嘅燈光照落塊面度，我隱約都見到佢地個樣。
傻仔西……
Natalie……
Catsy……
Kenson……
細芳……


仲有嗰個係……
我揸住支電筒照住剩低個身影嘅後尾枕，一路等佢轉過嚟……
就喺佢拎轉頭嗰刻，我望住佢個樣，覺得好熟口面。

「仆你個街！呢個咪我嚟嘅！？」