我每星期都會去摩星嶺同佢啪啪啪: 四

【上文提及】
為左揾返Kenson同傻仔西，我自己一個沿住摩星嶺嘅山路上山，最後去到一座廢堡面前。同時，我亦發現部電話終於收到訊號，於是我就試下what$app Kenson同傻仔西，睇下可唔可以聯絡到佢地，但係佢地就一直都冇睇我嘅msg。正當我等緊回覆嘅時候，我已經不知不覺間被山火包圍，完全係處於無路可逃嘅狀態。

【我每星期都會去摩星嶺同佢啪啪啪 - 四】
原本只係諗住嚟揾啲新野挽下，點知而家分分鐘會搞到連條命仔都冇埋。我先得嗰十幾歲連愛都未做過真係唔想就咁就死。不過就算係咁又點呀，啲火燒到咁旺，就算係我身後嗰座歷盡風吹兩打日曬雨淋，過左唔知有幾多個十依然䇄立不倒嘅廢堡，睇黎而家都已經被火化緊。

我下意識拎轉頭望下座廢堡燒成點--咦？我有冇睇錯？周圍都咁大火但係座嘢竟然冇燒著到！我行近廢堡，伸手摸下外牆--竟然完全唔覺得熱。雖然有啲奇怪，但係呢座野嘅防火程度仲勁過好多現代社會嘅所謂摩登大廈。發現左呢點，我唔再諗咁多，第一時間走入廢堡，至小我可以肯定座野冇咁會被燒著，可以爭取到多D時間等救兵。

咪住？救兵？頂！我正一死蠢，啱啱發覺有山火之後就淨係識得喺度頹，就算收到訊號都唔記得左要報警，呢次真係搵鬼嚟救我啦！我唔再企喺廢堡對住個門口發吽哣，即刻拎部埃瘋出嚟打九九九。



「嘟--」
「嘟嘟--」

「九九九報案中心。」
「喂！我而家喺摩星嶺遇到山火走唔到呀，唔該你快啲派消防……」
「九九九報案中心。」
「喂！聽唔聽到呀？我喺摩星嶺遇到山火被困呀！」
「呢度係九九九報案中心，有咩可以幫到你？」
「吊！我話我而家喺摩星嶺呀！有山火呀！我走唔到就俾火燒死啦！我求下你快啲揾人嚟……」
「搞錯啊！又係運吉嘅！」


對方講完之後，就嘭一聲收左線。我之後再過去嘅情況都係咁--雖然接通左，但係對方就完全聽唔到我講野。

呢一刻，我覺得自己就好似嗰啲整人節目入面被整蠱嗰個對象咁，完全俾個天玩弄於股掌之中。先係俾希望我，等我以為黎到呢度可以揾返Kenson同傻仔西，之後就整場山火俾我歎。到我以為死硬嘅時候，又俾我發現座廢堡可以俾我避下等救兵。偏偏喺我揾到呢個短暫嘅藏身之所之後，我先發現報唔到警。經歷左一個又一個嘅起伏，一次又一次咁睇住烏雲蓋過曙光，我已經再冇求生嘅意慾。我慢慢坐喺地下度，拎返部埃瘋出嚟，諗住send返段遺言俾屋企。

㩒開wts一睇，原來傻仔西已經覆左what$app。
[10:13pm] 西：入嚟啦
[10:13pm] 西：我同Kenson都喺入面
[10:14pm] 西：入左門口之後右手邊有條樓梯上一樓㗎
見到佢嘅msg我成個人醒一醒，估唔到我仲有機會可以見返佢地。我冇諗咁多即刻開返個電筒周圍照下果然，就喺我嘅兩點鐘方向就有條樓梯通去上層。我冇諗咁多就行左上去，一樓嘅情況同地下差唔多，漆黑一片，完全要靠電筒照住先睇到野。我四圍照下睇下揾唔揾到Kenson同傻仔西嘅蹤影。就喺前面大約十米嘅距離，我隱約見到有幾個人影。



一、二……三、四、五……
係咪我眼花？點解我會數到有五個人喺度嘅？冇理由㗎，唔通除左傻仔西佢地仲有其他人喺度？就喺呢個時候，我突然間記返起啱啱喺山路度佢地兩個喺咁行叫極都冇反應嘅事。唔到，佢地兩個真係俾鬼上左身？我見到多出嚟嘅身影唔通係……

我究竟應唔應該行過去睇下呢？