總在寂夜裡想起妳: 6

呢日起身之後照常返學，夜晚要參加商學院嘅活動。 

呢度介紹下個商學院先，佢話想我地入到去容易啲識到人，所以將幾百人分咗入唔同嘅學院，情況同哈利波特差唔多。不過實際作用有幾大就無人知啦。 

個活動就係每個學院派幾條友出去圍住個校園跑，跑贏就有分加。我哋冇份跑嘅就要做啦啦隊，幫自己學院打起咁話。 

咁個日開始翻風，開始凍，我都着多兩件衫就去咗大堂集合。本來對呢個活動可以話無乜期望，邊有人被逼去做啦啦隊仲可以好亢奮先得架 

不過唔緊要，大把機會望下啲囡囡 





嘩，呢個韓風味重喎。咦，呢個身材唔錯喎。 

「嘿嘿，做乜周圍望呀，搵我呀？」突然有條友輕輕力拍一拍我個頭，唔駛另轉面都知妳係邊個啦。 

「咦，做乜著黑絲嘅？知我鍾意呢味嘢呀？」唔知邊度嚟嘅勇氣，我竟然調戲佢 

「講呢啲！」佢一嘢打咗落我手臂度，但個樣唔似嬲喎，仲甜絲絲咁笑喎。「我返去我組個邊先啦。」 

之後我同佢都分開返自己組練打氣歌，我得閒就偷望下佢，佢見到我望佢又甜甜地咁笑回應我。邊個話呢啲活動增進唔到同學與同學之間嘅感情！學校你搞幾多個我參加幾多個！ 





好快已經入黑，跑山嘅同學仔到差唔多到後山終點，我哋一大班人就移師去後山，途中我見佢同佢女仔FD傾緊計，所以冇主動行上去。反正仲有明天個party 

去到後山，個環境真係幾浪漫。唔計成班仆街仔係後山廣場嘻嘻哈哈之外。我都懶得陪佢哋癲，去咗遠少少嘅露天茶座就坐低咗。一坐低成個人即刻放鬆晒，遠邊嘅煩囂都好似比枱上支蠟燭淨化咗，聽到嘅只有冷風輕撥幼草嘅聲音。 

抬高頭，滿天繁星，襯托著半彎嘅銀月，呢個時候妳坐我大髀比我擁在懷裡就perfect池。 

「一個人寂對夜景，小心觸景生情呀。」聽到佢把聲成個人醒一醒，掛住FF都無留意佢行咗過嚟。 

「兩個人，都未必慰藉到對方嘅靈魂嘅。」我依舊抬高頭，懶係唏噓咁講，實情係我怕醜唔敢直視佢 





「你啱嘅，唔係兩情相悅，天時地利再好，都填補唔到人和嘅缺憾。」佢嘆咗口氣。我第一次聽到佢嘆氣。佢一直比我嘅印象係活潑開朗，估唔到都有多愁善感嘅一面。 

聽到佢咁講，我好自然擰轉面望住佢，燭光下坐係對面嘅佢就好似幻覺一樣，好唔真實，唔通又發夢？ 

「好凍呀呢度，行番去大隊個邊啦。」佢企咗起身，黑影嘅襯托下佢顯得弱質纖纖，惹人憐愛。 

「嗯。」我行咗埋去，隻手有啲衝動想拖佢，但我諗起佢講嘅嘢，係咪暗示緊我同佢只不過係有緣，唔會有份？我隻手縮返入褲袋，若無其事咁同佢行咗返去。 

途中我哋都冇再講嘢，頭側側嘅佢若有所思，我亦充滿疑問，不過無人打斷呢段沉默，星空下無言勝有言。 

返到大隊，佢連再見都無講，就走開咗。 

沒有再見了嗎？ 

我再一次抬高頭，銀狐嘅尾巴卻被灰黑嘅皮毛遮蓋咗。 





天，暗淡無光。 

苦笑，掩不住失落。 

我向反方向離開，離開呢個回憶裏如此美好嘅地方。 

過咗咁耐，我一直好想問妳，個日如果我拖妳會點？