總在寂夜裡想起妳: 5

好快就到咗sem最後嘅一星期，返學嘅氣氛都無以前咁輕鬆，大部份功課同project都係呢個星期入面deadline，而且又要應付一星期後嘅考試，我都漸漸投入咗係作戰狀態。 

同佢之間嘅事我都暫時放低咗一邊，而家同佢亦幻亦真嘅關係，比要面對現實來得更易接受。 

尾二嘅英文堂好快就上完，落堂嘅時候我哋成班男仔交換電話，然後我望咗去女子組個邊，見到佢同佢班朋友有講有笑，我好想行過去問佢拎電話，但我鼓唔起勇氣，我好害怕一直以來係自己嘅一廂情願，係自己會錯意。 

心入面比咗好多好多藉口俾自己。下堂先拎啦，反正下堂ah sir話搞party，到時再問應該先最啱時機嘅。就下堂先拎啦，我同自己講。 

我快步走出咗班房，離開咗呢個令我煎熬嘅地方，但係思緒並沒有靜落嚟。 





一星期之後可能唔會再有相遇嘅一天，面對分離，人總係變得特別脆弱，特別孤寂。 

頭頂上嘅薄雲，彷彿為我蓋上了陰霾，眼中看出去嘅色彩都變得單調起嚟。要形容依家嘅心情，一字記之曰：好撚灰。 

成個人變得沒精打采，下晝堂都決定走咗去，返到屋企hea下hea下就過咗十二點，屋企人都訓曬。 

一個人坐係間房到，感覺到嘅只係無盡嘅寂寞，係呢個時候，我最希望出現喺我身邊嘅，竟然唔係我女朋友，而係妳。 

唔好諗咁多啦，上床訓啦。 





光管熄滅，房間一下子變得黑暗，溫度都好似驟然低咗幾度。 

「咦？點解你係度嘅？」周圍突然變得白茫茫一片，放眼望出去毫無盡頭，唯獨係佢站係我跟前，散發出一股和暖所有不安情感嘅氣場。 

佢冇答我嘅問題，而係靠近我，左手摟著我腰間，右手放上我嘅左手，十指緊扣，微一抬，跳起只屬於我同佢嘅舞步。 

我知道自己發緊夢，但佢身上如蘭嘅香氣已經令我失去咗思考嘅空間，只能夠跟住佢跳。 

轉一圈，兩圈，三圈。 





擁著眼前的這個人，鼻與鼻之間只有咫尺之近嘅距離，我從來都唔知原來近睇妳係咁靚。 

不染塵世凡間煙火的天使，守護我一生好嗎？ 

多麼多麼希望時間會係呢刻停止，可惜事與願違，我老媽子嘈醒咗我。 

我係床上坐直身子，望著窗外朝陽初升嘅一幕，我知道我係確確實實喜歡你了。 

唔再係寂夜裡。而係分分秒秒。想起你