《港女FF妄誌》: [Day 01－平凡港女] PART 07
對住束紅玫瑰一做就做左成個下午...
一做就做左成日...
「我走喇～聽日見啦～」
又到放工時候...
『嗯～聽日見啦～』
老實講句...今日真係無乜點做過野...
不過唔緊要啦～返工梗係要Hea住做架啦～
咁落力好快無命架咋～
而我而家呢～就要準備一下要見人～
我係唔會唔記得今晚係要見呢個舊情人...
雖然話我平時都唔使點化妝～之但係用面油紙印下都要既～
我就入左女廁印下面油紙～又搽返D Cream～梳下把秀髮～照下塊鏡～睇下D衣物夠唔夠整齊～
確保妥妥當當之後就起程～
放工既時間都真係幾多人～
成個地鐵站都迫滿晒人～
我就只好靜心咁等下一班...等下一班...
等下一班...等下一班...被一個又一個死口死面攰到無晒表情既香港人包圍住咁等...
點解會咁架呢？
點解會變到個個都好似無晒目標咁架呢？
又由幾時開始呢？
又由幾時開始變到放工都唔識笑架呢？
我記得中學既時候，放學一班人都係嘻嘻哈哈～BiLiBaLah～
同幾個好姊妹行去睇下衫～坐下Starbucks～𥄫下靚仔～
又會俾班男同學扯下馬尾～揭下校裙～彈下Bra帶～拉下背後條拉鍊～
就算係俾人玩，總會有講有笑～總會笑容滿面～
但而家呢？
係不知不覺之間...身邊既人都係死口死面...死氣沈沈...
或者...我都唔理得人咁多...
或者...人地睇我都係咁...
同一班行屍走肉既喪屍一齊行屍走肉～
企喺架地鐵車廂裏面搖下搖下...搖下搖下...
搖下搖下...好唔容易咁先搖到黎銅鑼灣...
又跟住D人擺下擺下...擺下擺下咁先擺到上黎SOGO門口...
雖然話SOGO門口企滿晒人～仲有D人企喺個垃圾筒隔離食煙～但總係覺得有D凍...
今日都真係…有D凍...
其實香港呢幾年都無乜點凍～
冬天仲要越黎越遲先黎～
上年聖誕我仲可以著件加細碼Tee～熱褲～黑絲～Boots～最多都係帶埋件鬼咁薄既外套就出去蒲～
嗰D羽絨丫～大褸丫～冷帽丫都唔知收埋晒喺邊～
根本就用唔著～都唔使攞出黎～
之不過...一年裏面總有幾日係凍到痴肺～
就好似今日咁...到左夜晚就只有十度八度咁上下...
但你又唔覺唔覺咁...又唔著多件衫...
到真係覺得既時候通常都已經太遲喇～
因為真係好凍...
凍到入晒心...凍到個人都震埋...
我就企喺道震下震下咁等...震下震下咁等...
望住人來人往既SOGO門口...望住車來車往既軒尼詩道...
「李施德林～」我聽到背後有一把久違既聲音...
我帶住微笑...慢慢轉身：『點丫～高露潔～』
我望到一個已經好耐都無親眼見過既面孔...
呢個面孔...好平凡...好似周街都係...你想話佢係路人樣...但你又唔會覺得佢似邊個...
你又唔會話認唔到佢...只係當你諗起佢既時候...你又講唔出有乜野特徵...
總係唔覺得有阻隔～好似好親近～好平易近人～
「哈哈～好耐都無人叫過我做高露潔架喇～」皓傑笑笑口～
皓傑～高皓傑～同我同年既舊男友～
『夠好耐都無人叫過我做李施德林咁老套咯～』我恥笑一下皓傑～
「好老套咩？唔係丫～幾好聽丫～」皓傑傻下傻下咁笑笑口～
『你就梗係覺得好聽啦～因為你幫我改架嘛～嗰時丫～俾人笑左幾耐知唔知丫？』我扮晒嬲嬲豬咁谷起塊面豬登～
「你幫我改個花名做高露潔夠係啦～打波既時候個個都“高露潔接波！高露潔交波！”咁嗌丫～真係成個場D人都圍住我黎恥笑～幾咁面懵～」皓傑又扮晒無奈咁～
『哈哈～咁咪好囉～可以成為焦點～』我打量一下皓傑～
皓傑又帶住微笑打量一下我...
我地望左一望對方...望住都已經有差唔多十年無見過一面既對方...
一時之間...好似唔係好知講D乜好...
唔係話無野想講…
而係太多野想講...
好似有好多好多野喺心裏面...一直都無機會講...無機會面對面咁講...
到有機會面對面既時候...又唔知應該由邊道講起...
又由邊句說起...
「十年無見...你都無變...」皓傑仔細咁打量住我...再望住我對眼...
『你都係...都係同十年前差唔多…』我都仔細咁打量一下皓傑...望住佢對眼...
皓傑都同十年前無乜分別～
都係高高地～瘦瘦地～
係面上帶左點...滄桑...
係滄桑？應該係...
喺呢個急速又殘酷既冷血社會裏生存左十年...總會帶一點點滄桑感...
或者總會有D經歷...
或者總會有D傷痕...
或者咁樣先會變成一個成熟既男人～
不過除左話皓傑面上帶左點滄桑之外，仲帶住點...蒼白...
皓傑既面上好似無乜血色咁...
就算係戴住左條紅色頸巾喺頸上既佢...面上都無乜血色...
仲要好似青青地咁...
係因為今日真係太凍？凍到面都青埋？
或者係...或者真係...
『乞…』或者真係太凍...凍到我都打左個乞痴...
「凍又唔帶返條頸巾出門～你都仲係咁～」皓傑一邊擰下擰下頭，一邊除自己頸上條頸巾出黎...
皓傑將條頸巾搭到上我條頸上...打左兩圈...
好暖…條頸巾都真係幾暖...
我見皓傑面青青咁...仲以為條頸巾會有D凍添～
除左話條頸巾幾暖之外...仲有...仲有呢陣味...
已經有好耐無聞過既氣味...
係皓傑既氣味...
都有十年...差唔多有十年無接觸過呢陣氣味...
而而家一聞...除左話喚醒左我對呢陣氣味既記憶之外...仲有D回憶...
過去既回憶...過去既回憶片段...
過去既回憶片段喺我腦海之中閃過...飛過...
好快…好快...真係好快好快...
就好似唔想記起咁...好似想逃避咁...
潛意識唔想記起...所以逃避...
喺影像未由腦海之中投射到眼前之前...失消得無影無蹤...
『咁我唔怕凍架嘛～乞...』話口未完...我又打左個乞痴添...
「你係唔怕凍丫～但會凍病呢～我地都係行入室內先啦～」皓傑開始行。
『我都未問你丫～做乜咁好死搵我出黎食飯丫？』我就跟上前～行到去皓傑身邊～
「見咁耐無見～咪諗住搵你出黎聚下舊囉～」皓傑笑笑口咁望住前路～
『耐無見就要聚下架喇？我仲以為你要派帖添～你知架啦～而家D小學同學丫～十年都無見一次既舊朋友丫～搵得你出黎丫～唔係炸你就問你借錢架啦～』我古古惑惑咁用右邊膊頭撞一撞皓傑既左邊膊頭～
「我連拖都無拍丫～派乜鬼野帖～講到錢喇喎～係要問都唔會問你借啦～睇你都唔慌會有儲蓄習慣～」皓傑送左對冷眼俾我...
『下？仲未有拖拍丫？你唔係仲等緊我丫嘛？』我又古古惑惑咁打量一下皓傑～
「我似係D咁長情既人咩？」
『你唔似～但你係囉～』
「咁多年你都仲係咁既～」
『咁多年都仲係點呢？』
「咪就係咁囉～」
其實皓傑有無拖拍，我大概都估到～
呢幾年睇佢D頭像都只係見到佢D背影丫～背影丫～同背影丫～
全部都係一個人～身邊搵多個路人睇下都無～
而張張相左邊都會留左一大個空位添～
或者呢D就係構圖掛～
唔知啦～我都唔識影相既～
我就係識自拍要由上而下四十五度角咁影～
而皓傑好日都唔會Update下自己個Facebook～Up親都係D“一個人的浪漫系列”～
即係他看戲也一個人看～他放假也一個人放～他跳舞也一個人跳～他說笑也一個人笑～他喝醉也一個回家～他怕冷也一個人怕～
任何時候都係他一個人～
咁既生活又邊似有拖拍～
之但係點解我明知佢係無拖拍都仲要走去問佢係唔係派帖？
原因我正正就係想問下皓傑...係唔係仲...等緊我...
當然就算我問得咁直接，皓傑都唔會直接咁答我～
事實上就連口風都探唔到～
不過重要咩？
其實都唔係太重要～
反正...我都唔係太在乎...
皓傑真係仲等緊我又好...咁岩仲未遇岩又好...我都唔會變...
我對皓傑...唔會變...
十年...要變就一早變左...
唔會等足十年先黎變...
「你都真係無變架喎～」一入到間日本餐廳坐一坐低，皓傑就拎起份Menu睇下睇下～
『嗯？』我又拎起份Menu睇睇～
「都仲係好似中學時咁既樣～細細粒粒又天天真真咁既外～表～又無老過～十足十黑山童姥唔得老～」皓傑特別強調“外表”呢兩隻字...
『有D部位變左你睇唔到姐～你夠係啦～都係同中學時候既你差唔多～都係無乜點老丫～』話我黑山童姥...你咪黑山老妖囉～
「我？殘左好多喇～」皓傑無奈咁擰擰頭。
『算係咁啦～多左點點滄桑～仲有少少蒼白咁囉～』我又打量一下皓傑～
「嘿嘿...」皓傑輕輕咁笑左兩聲...
『係喎～呢間野逐碟計～碟碟都五十幾六十蚊～請我食D咁貴既野...你撈得好掂咩？』我望住份Menu...
入面一碟搵笨實既三文魚壽司都要成五十蚊...
一碟仲要得兩件...
我Lunch先話要節衣縮食...
而家又走黎食得咁豪…真係夭折都唔掂...
「咁耐無見請你食好野又有乜所謂～邊係撈得掂丫～岩岩先炒左老細魷魚～」皓傑講到若無其事咁！
『下？炒左老細魷魚？唔係真係一句“我唔嘟撈喇！你挺執笠啦！”咁丫化？』其實我都係隨口噏下話叫皓傑請咋喎...
而家仲要知道皓傑炒左老細魷...我仲邊好意思丫...
「咁又無咁型～只係隨口講左句“唔做喇”咁囉～」皓傑仲係若無其事咁...
『你老細無留你咩？』我諗做下樣都要掛...
「有～問我想加幾多～之不過我同佢講我唔係跳草裙舞～咁佢都唔多講喇～」皓傑都仲係若無其事咁...
『抖下都好既...』香港生活迫人...有得抖下都唔錯...『咁...你諗住搞D乜？』
「我？唔...」皓傑諗左一諗，「離開香港囉～去下旅行囉～去遠D既地方囉～去下冰島囉～」
『願如期團聚於冰島某地方丫？哈哈～雷克雅未克丫？哈哈～去福島罷啦你～』我恥笑一下皓傑～
「福島丫？都有得諗喎～」皓傑傻傻一笑～
傻佬～你真係當你自己係Juno咩～
你真係當你既故事係三部曲咩～
相同既故事...唔係個個都咁感人...
係要睇下邊個做主角...
我同你...死得啦～
唔好話感動八百萬香港人～十萬點擊率都無我地份啦～
「咁你呢？都係喺嗰間書商道做？」
『嗯～都係～』
「呢份長D喎～」
『都係架～算係最長啦～』
「仲係嗰個消防員男朋友？」
『嗯～仲係～』
「呢個都算長喎～」
『咩丫？岩岩先一個月咁上下咋嘛～』
「一個月對你黎講唔長丫？」
『仲可以長D囉好唔好？』
「係喇係喇～叫D野食先啦～你都肚餓架喇～唔該～」
愛情故事來來去去...其實都係咁上下...
點解Juno既十年故事可以震撼八百萬港人？
點解我既愛情故事就連陣陣漣漪都泛起唔到？
就係因為...我唔係淫Kay...
我淫極...最多都係只可以成為一個甜故...
驚天動地既愛情故事？唔輪到我...
或者...只可以係...甜甜地既愛情故事～