《聽說她是一隻Hell雞……》: 第三十一節

「請問係咩事！」我已經等唔切，好想即刻知道一切。
 
「佢想叫我同你講，佢好多謝你呢段時間時間嘅照顧，佢不嬲喺大學入面冇咩朋友，但佢喺你身上搵到關心、愛護……」
 
「所以？所以呢？」我好大聲咁喝咗出嚟。
 
「所以……所以佢一直都當你係好朋友，所以一直同你保持距離，佢知你鍾意佢。」
 
「Bullshit！咩嘢叫好朋友？如果佢唔鍾意我，佢點會同我去Halloween？點會刻意同我保持距離？點會肯俾我拖住佢隻手？」我連珠爆發咁講咗出嚟。
 




「嗚……佢想同你講話佢會去旅行散吓心，因為佢接受唔到喺學校所承受嘅壓力，所以退咗學……」電話嘅另一邊傳嚟咗一陣啜泣聲。
 
「屌！你喊乜撚嘢！有嘢咪講囉！」我冇顧及乜嘢君子儀態，亦冇可憐Mandy，對住個電話大吼：「有乜撚嘢你即刻同我講晒出嚟！你咪撚呃鳩我！到底Candy係咪Hall雞！」
 
「唔係！」
 
「嗄……嗄……」
 
再一次，電話兩邊都靜止咗。
 




「全部嘢，都係由Year one開始發生……」Mandy好努力咁收住佢嘅咽嗚聲。
 
「Sorry，啱啱我衝動咗，你繼續講。」
 
「佢啱啱入嚟果陣，有一個男仔不斷向佢追求，但Candy點都唔肯應承佢，果個男仔就算點死纏爛打都唔成功，之後索性周圍同人傳Candy係Hall雞……」
 
我好嬲，同時個心好痛，但我可以做到啲咩？我一直以為自己可以保護到Candy，但傷得佢最深果個亦都係我。
 
「之後件事愈傳愈開，初頭啲人見到都只係講吓笑，但人言可畏，每個人都加鹽加醋，最後呢件事變到好似真嘅一樣。Candy本身朋友唔多，而件事發生咗之後佢更加可以話係冇晒朋友。」Mandy索一索個鼻，繼續講：「但佢又唔肯去澄清、去解釋，結果誤會愈嚟愈深。」





「如果佢唔係，咁點解佢成日都唔喺Hall？」我問咗呢個問題。
 
「……」
 
「答我！」我一拳打咗落道牆度。
 
電話另一邊嘅Mandy終於崩潰，泣不成聲。