《聽說她是一隻Hell雞……》: 第三十節

之後嘅日子，我都再冇見過Candy。
 
星期五嘅Lecture，我再見唔到佢熟悉嘅身影。
 
我估應該係佢刻意避開我，因為果日大家都心知肚明，佢嘅拒絕、我嘅衝動，造就咗今日呢個局面。
 
十月十二日，第一個冇佢嘅Lecture。
 
果一晚，我飲到爛醉，嘔到成房都係，辛苦晒我Roommate幫我抹地。
 




果一晚，我夢到佢，喺巴士上面，佢挨住我瞓，佢嘅容貌深深咁刻喺我嘅腦海。
 
果一晚，我聽到啲人話Hall雞退咗學。
 
果一晚，果一晚……
 
到咗第二日起身，我個頭好痛，我按住個頭爬起身，睇睇部電話，見到有一個未接來電，係一個我從來未見過嘅電話號碼。
 
我即刻打咗過去。
 




「嘟嘟嘟……嘟嘟……」
 
「喂？」電話另一邊傳嚟咗一把女聲。
 
「喂，我係阿Jack，你搵我咩事？」
 
「你係阿Jack？我係Mandy呀，係Candy個Friend。」
 
「係！請問發生咩事？」
 




「Candy佢因為私人理由已經退咗學，佢留低咗啲說話拜託我同你講。」