《聽說她是一隻Hell雞……》: 第三十二節

「佢要去醫病……」Mandy喊咗好耐，幾經辛苦終於吐到呢幾隻字出嚟。
 
「屌你仲有咩呃住我！快撚柒啲同我講埋落去！」
 
突然間，周圍變到好靜，我腦海閃過好多片段：點解Candy個妝愈嚟愈濃？點解佢去到邊都要化妝？點解佢成日都唔喺Hall？點解果日食宵佢要放我飛機？點解佢要同我劃清界線？點解去Halloween果陣佢咁驚俾人掂到佢個頭？點解……

 
「佢係咪去咗旅行？講呀！」
 
「唔係……」Mandy繼續喊：「佢叫我千其唔好同你講，但係佢又唔捨得一句都唔同你講就走。」




 
「咁即係點！」呢個時候我早已坐立不安，喺房度行嚟行去，心急如焚。
 
「佢嘅病情已經惡化緊……」
 
我聽到呢句，個腦好似震咗一震，成個人腳步一輕，跪咗喺地上面。
 
「你估中咗，Candy真係鍾意咗你……」
 
呢一刻，連日嚟嘅情緒波動終於令我嘅眼淚崩堤……對唔住，Candy，我寧願唔知道。




 
以前嘅我一味剩係識懷疑你係咪Hall雞，冇真正咁踏入你嘅內心世界，只係不斷去嘗試跨過你劃落嚟嘅界線，而冇諗過點解你要不斷咁避我。我冇諗到原來每一個女人嘅思海，都埋藏住咁多暗湧。呢一次海洋公園之旅，係咪你想為我哋呢種發唔到芽嘅感覺留下最後一段追憶？
 
「唔該你。」我講完就Cut咗線。
 
我趴咗喺地吓，抱頭痛哭，呢一場淚雨，可以算係我對你嘅痴情嘅一種交待……