《聽說她是一隻Hell雞……》: 第二十九節

我腦海一片空白，下意識用隻手擋住咗度Lift門，「嘭」一聲，度Lift門自動彈返開，門外嘅佢已經掩面痛哭。
 
我二話不說，上前將佢推咗埋牆，我將我個頭哄埋去，使我哋之間嘅距離不足三厘米。
 
我清清楚楚、確確實實咁聽到佢嘅呼氣聲、感受到佢嘅鼻息、見到佢眼蓋上嘅眼影，同埋沿兩邊臉頰俏俏滑下嘅淚水。
 
呢一刻大家嘅喘氣聲愈嚟愈重、愈嚟愈急促，但佢遊離嘅眼神並冇正視住我。
 
我右手穿過佢嘅髮絲，慢慢繞到佢後頸，合埋眼，將個嘴緩緩哄到佢嘅唇邊，點知佢突然間推開咗我，我企咗喺原地，一時之間反應唔到。
 


「Jack，對唔住，我哋唔可以……」佢垂低頭細語，髮絲完全遮蓋咗佢嘅容貌。
 
「點解？點解唔可以？」
 
「……」
 
「點解其他人俾錢就得！我就唔可以！」我終於忍唔住，講咗一句覆水難收嘅說話。
 
Candy聽完呢句之後，佢嘅嗚咽停止咗，成個空間鴉雀無聲、死寂一片，我……到底喺度做緊啲咩？
 


「Candy……」我伸手嘗試去觸及佢嘅肩膊，佢一下子甩開咗，然後徑自打開宿舍走廊嘅門，一彎熟悉嘅身影離我愈嚟愈遠，然後消失喺轉角位……
 
我坐咗喺地下，欲哭無淚，個心猛烈咁揪住揪住……