《聽說她是一隻Hell雞……》: 第二十八節

落咗車之後，我哋拖住手行返Hall，一路上大家都冇講嘢，只係靜靜咁感受住彼此手心嘅溫度，我心跳不斷咁加速，思緒紊亂似煙，我諗佢都係一樣。
 
不過去到樓下嘅時候，佢突然鬆開咗我隻手、拎返個袋，我嘅美夢就好似一隻斷咗線嘅紙鳶，飄到一個我到達唔到嘅地方。
 
「我俾唔到啲乜你，今日嘅嘢當係我對你嘅補償。」Candy哄埋我耳邊講咗呢番說話，然後錫咗我塊面一啖。
 
果一刻我全身每一條神經都好似觸電咁，感覺傳遍我嘅四肢百骸。就算燈光再昏暗，我都知道自己塊面紅到好似一個熟到爛透嘅蘋果一樣。
 
Candy，我冇要你俾我啲乜，我只係要你喺我身邊，就算唔係以我女朋友嘅身份，點解一定要封殺我，唔俾我接近你？
 


佢呢一吻，係我哋之間嘅閉幕。到底係出自真心定係逢場做戲？我已經分唔清。
 
入到Lift之後，我為佢噤咗佢果層，全程我哋冇講嘢，更加冇眼神交流。因為大家都有共識，再講落去嘅話好有可能會越過果條不知所謂、毫無目的嘅界線。
 
Candy，我真係好想同你講，我唔介意你之前做過啲乜、係邊個，我只係介意你會喺我面前消失。
 
我好矛盾，一方面唔想咁快講再見，一方面又唔想大家一錯再錯。終於，「叮」一聲，部Lift到咗佢果層，佢行咗出Lift出面望住我，我冇噤制去閂門，只係等度門慢慢合埋，佢嘅眼神又再一次消失喺門縫之間，同第一次見佢嘅時候一樣，唔同嘅係，今次我見到佢眼眸入面泛起咗一絲淚光……