《聽說她是一隻Hell雞……》: 第二十七節

十點鐘果陣，我哋用張優惠券玩咗「全院嚇滿」，之後我哋就一齊搭巴士走。
 
離開公園嘅時候，我問Candy：「我哋玩咗成日，其實你攰唔攰？」
 
「唔攰呀。」佢答。
 
「唔准對住我講大話呀！」我故作嚴肅，問：「攰定唔攰？」
 
「其實好酸好攰，嘻嘻。」Candy好調皮咁笑咗一笑。
 




上咗巴士之後，我就同佢講：「不如你挨住我瞓，我諗你都好攰。」
 
佢望咗我一眼，就背向我挨咗落嚟，果一刻我並冇太大反應，我只係想佢可以休息吓，同埋只係想時間過得慢啲，等呢一剎那唔好咁快溜走。
 
Candy講過佢係一個好易暈車浪嘅人，挨住我，我只係希望可以做到佢嘅浮台、避風塘。
 
我望住窗外嘅夜色，個心好平靜，好難得有一刻我嘅思緒係可以咁恬靜，唔去諗佢嘅身份、佢嘅過去，只係望住佢面上嘅妝容冇因為汗水而褪色，閉起嘅眼簾上面畫咗一抹淺紫色嘅眼影，我默默咁將呢個畫面記喺腦海。
 
雖然我哋依家身體嘅距離係好近，但我深知佢內心仍然緊緊咁封鎖，我冇奢望可以開解佢嘅心扉，只係希望可以將我哋一齊嘅呢一剎那化作永恒。
 




正當我望佢望得入迷嘅時候，佢突然醒咗坐咗起身，問：「你做乜望住我瞓教個樣呀？」
 
「冇，因為你好靚。」話畢，我一手捉住咗佢隻手，佢冇反抗，我知道我犯咗規，越過咗大家暗暗劃下嘅界線，不過為咗你我又何妨一錯再錯？