《聽說她是一隻Hell雞……》: 第十五節

「Jack，我好肚餓呀……」Candy喺十點幾嘅時候Whatsapp我。
 
「照舊十半Lobby等。」我覆完佢之後，就換套衫落咗去Lobby。
 
我企咗喺度等咗成幾個字，佢都未落嚟，我就打咗個電話俾佢……
 
「你所打嘅電話暫時未能接通，請你遲啲再……」我未等錄音播完，已經Cut咗線。唔係放我飛機掛？於是我Whatsapp佢：「搞咩搞咁耐呀？」
 
不過我等咗好耐，佢嘅最後上線時間都仲停留喺我同佢Firm完時間地點之後，跟住就冇再上過線。
 


果一刻我真係有啲嬲，明明自己約我食宵夜又要放我飛機，你當我係啲咩？隨傳隨到嘅兵仔？算！老子食自己！於是我就自己去咗食宵夜。
 
果一晚，啲粟米真係一啲都唔甜唔好食……
 
第二朝起身上堂嘅時候，我收到Candy嘅Message：「唔好意思呀Jack Jack，琴晚突然間有啲唔舒服所以嚟唔到，最多下次請返你食宵補數。」
 
本身啖氣仲谷住谷住，不過知道佢唔係有心放我飛機，我都冇再嬲，於是覆咗句：「唔緊要啦，得閒再一齊食啦。」
 
過咗一陣，我又諗，會唔會係突然間有急Call出咗去接客？如果係嘅又點會撞我唔到？唉，我思緒好亂，但我又問唔出口佢到底係咪Hall雞，就算問咗，佢都一定唔會答我，更加會破壞我哋之間嘅關係，一句講晒：晒鳩氣。
 


之後果日嘅堂都係Hea住咁上，落咗堂都係喺高登入面渡過。到咗夜晚，手機突然響咗響，我即刻拎起嚟睇。
 
「團購優惠……」原來係垃圾宣傳Email，我屌你老尾。
 
果晚我等咗好耐，最後都係冇收到佢嘅Message。