《聽說她是一隻Hell雞……》: 第十六節

之後幾日我亦都冇再撞到佢，直至到星期五嘅Lecture……
 
我入到演講廳，望向中間果行，見到佢嘅背影之後，我暗暗鬆咗一口氣。
 
佢啲頭髮好似長咗少少，頭髮嘅顏色亦深咗，我未行到埋去，佢已經發現到我，就好似一直等緊我咁。
 
我同佢對望咗幾秒，只見佢嘅妝比以往濃咗少少，佢話：「企喺度做乜？快啲過嚟啦。」
 
我好想講一句：「傻妹，我好掛住你。」不過現實嘅我只係講咗句：「哦。」就坐咗埋去。
 


呢一堂明明唔係Philosophy，但我卻思考咗好多嘢，到底我應唔應該繼續沉淪喺呢段唔知有冇結果嘅感情？如果我真係真心鍾意佢，我又應唔應該介意佢做過啲乜嘢？結果，呢堂過得好慢，我亦冇乜點同佢傾計，可能佢以為我仲嬲緊所以唔太主動同我講嘢，而我亦浪費咗一堂Lecture、浪費咗父母俾我嘅學費。
 
落堂果陣，佢忽然問我：「不如今日一齊食Lunch？」我感覺到佢語調有啲生硬。
 
「唔啦，我約咗Friend呀今日。」我冇講大話，我真係約咗Kevin。而且上次應承咗請佢食飯，放佢飛機一定俾佢屌到皮開肉綻。
 
「哦，咁好啦，我搵其他Friend食。」佢講完之後好努力咁笑咗笑，但我察覺到佢其實係皮笑肉不笑，生硬嘅笑容完全唔襯佢。唔知係我錯覺定點，我覺得果一刻佢眼神閃過一絲失落。
 
「我走先。」佢執完嘢就匆匆忙忙咁走咗，我目送住佢背影慢慢咁消失咗喺Lecture嘅門口。我突然間諗起，如果佢真係Hall雞，咁好可能真係會冇乜朋友。
 


果一刻我真係好想衝出去，但我雙腳只係原封不動咁停留咗喺原地，好似俾釘釘實咁，郁都郁唔到。
 
我知我只係一條毒撚，學高登巴打話齋：毒撚，真係切忌有自信。
 
話雖如此，但我最後都係忍唔住Whatsapp咗佢：「Candy，你今日個頭隻色好深呀，睇落好似有隻大棕熊喺你個頭度，哈哈哈哈哈哈……」
 
佢只係應咗句：「死人頭！」