《聽說她是一隻Hell雞……》: 第三節

「應該冇問題嘅，不過我得一個鐘食Lunch……」Candy欲言又止，應承咗我之餘又提醒我動作要快啲。
 
「係呢，未知你叫咩名，我叫阿Jack呀。」我明知故問，順手自我介紹。
 
「你可以叫我Candy，我讀Year two㗎，點解你好似好面善咁嘅？」Candy呢一句說話就好似一支冷箭咁刺穿咗我嘅虛偽。
 
「吓？唔係掛？可能我個樣太大眾化啦，出街招牌都壓死幾十個啦，哈哈……」我乾笑咗幾聲之後轉移視線，廢事佢認得出我。
 
「不如你坐過嚟啦，有嘢想問我嘅可以方便啲。」Candy講完之後將佢左手邊嘅枱仔拉起咗，暗示我可以坐過去。
 


大學果然係大學，連啲Hall雞都識咩叫Attitude of service，劉華都慳返唔洗出場，而且仲咁識開拓客源，果然係高等學府！
 
就係咁，呢兩個鐘嘅Lecture喺我不斷問問題之中渡過咗。佢咁誠懇親切嘅態度，實在令人好難相信佢係性工作者，到底係Kevin鳩噏多過呼吸？定係Candy已經Mark實咗我，想我做佢客仔呢？呢一刻，時間並唔容許我諗咁多，我只係能夠見步行步，跟咗佢去圖書館印碌屎。
 
途中我哋一路有講有笑，雖然我講嘢口窒窒，但Candy嘅交際技巧真係大大咁減少咗Dead air嘅出現。
 
「係呢？你住咩Hall㗎？」突然佢話鋒一轉，問咗一條問題。
 
呢個問題俾咗我一種問卷妹嘅感覺：一開頭同你扮晒熟，然後轉個頭就Sell你基金保險。雖然我Feel到伏伏哋，不過我冇得唔回答，於是我話：「我住喺四號Hall㗎。」順手補多句：「做咩咁問嘅？」
 


「咦？我都係喎！又會咁啱嘅？可以得閒出嚟食宵。」
 
呢句嘢嘅潛台詞，無非都係：「得閒出嚟執返劑。」當然我知道呢個世界上係冇免費午餐，遇到呢啲咁Soft嘅Hard-sell，我唯有轉換話題：「係呢，點解住咗成個禮拜都未見過你嘅？」我講咗個大話，表示自己從來冇見過佢。
 
「係咩？其實我成日都唔喺Hall㗎……」佢眼神有一絲閃縮，唔通Hall雞只係佢嘅Part-time，援交妹先係佢嘅正職？洗唔洗咁勤力呀！