《聽說她是一隻Hell雞……》: 第四節

話都冇咁快，我哋已經到咗圖書館，佢講解咗一輪點樣上Moodle下載份Powerpoint落嚟再Set成一張紙六個Frame，然後又要設定密碼先可以列印，聽落好似好複雜，但其實學咗一次就識。
 
我整理完份Note，跟手打蛇隨棍上，問佢：「Candy，不如一齊食個Lunch啦？」
 
「Eh……唔啦……我約咗其他人。」佢有啲唔好意思咁拒絕咗我。
 
我硬食咗個檸檬，即刻扮晒有風度咁話：「哦，唔緊要啦，下次再一齊食囉。」再順手轉換埋話題：「今日唔該晒你呀，教咗我咁多嘢。」
 
「不如你俾你電話我吖，下次再約。」佢好甜咁笑咗一吓。
 


望住佢嘅笑靨，我真係唔識點樣拒絕，於是乖乖咁同佢交換咗電話，跟住佢就朝Canteen方向走咗。
 
佢教我印Note前前後後都搞咗三、四個字，我諗Kevin都應該差唔多落堂，於是我打咗俾Kevin。
 
「喂喂，喺邊呀你？」我問。
 
「啱啱落堂，做乜鳩？」Kevin說話永遠都離唔開粗口。
 
「冇，想約你食個Lunch啫。」
 


「好，出出面食。」佢好有主見咁提議。
 
「時但，後門等？」
 
「Okay，拜。」

就係咁，我哋嘅通話完結咗。精簡、淺白，呢啲就係男人嘅浪漫。
 
我拎住份Note行去後門，途中經過Canteen時好奇望咗入去，竟然見到Candy同一個男仔排緊隊買飯。Me heart think：咁高大靚仔都要叫Hall雞？真係陰公豬。
 


不過我必須承認，果一刻我係有少少醋意、夾雜住三分自卑七分葡萄。
 
喺後門等咗大約五分鐘，Kevin就嚟咗。