《聽說她是一隻Hell雞……》: 第二節

果一堂Lecture，由Year one至Year two嘅學生都有，係一個容納到大約二百人嘅演講廳。
 
返咗學未夠一個禮拜嘅我，當然揀咗一個對正中間Screen嘅位方便抄筆記。亦由於未適應大學嘅上堂模式，所以我早咗成十分鐘嚟到演講廳準備，果陣Lecture嘅人唔多，十隻手指數得晒。
 
我行到中間果行，沿住啲櫈望過去，發現一個熟悉嘅身影正喺度默默咁整理緊啲Note：一條雪白嘅頸、一頭淺啡嘅短髮……我行埋去坐低，先發覺到佢就係Candy。
 
見到佢諗起嘅第一件事，就係果日我喺部隔音咁差嘅Lift入面大嗌「Hall雞」呢個咁敏感嘅字眼，然後一開門就俾佢斷正，情況實在相當老尷。
 
雖然我同佢有一座之隔，但我真係好想拔足狂奔一走了之，不過男人老狗冇理由坐低咗之後又轉身離開咁失霸氣，而且Hall雞都係人，Hall雞都有感受，俾佢知我避佢嘅話佢一定好難過。香港地、香港人，從來笑貧不笑娼，就算係Hall雞，都係一個值得被尊重嘅行業。
 




大家試想像吓，一個女仔出生喺老豆爛賭、老母走佬嘅問題家庭，自細就睇透咗呢個腐爛嘅社會，為咗滿足對知識嘅強烈渴求而寒窗苦讀，仲要入埋大學，不過因為要還老豆啲賭債同埋要養埋個弱智細佬而要處女下海做Hall雞，用冰晶玉潔嘅軀體去換取幾分臭銅，平衡社會資源，何尚唔是一份高尚嘅情操？
 
正當我因為接受唔到「靚女都要做雞」呢個事實而為佢編制冠冕堂皇嘅藉口嘅時候，一把剛中帶柔嘅女聲打破咗我思緒：「同學點解你冇Note嘅？你係咪Freshman嚟？」
 
我抬起我個蓬鬆嘅毒撚頭，望住佢嘅容貌，一時之間諗唔到點樣應對。佢化咗一抹淡淡嘅妝，大眼、細鼻、薄唇……一個靚女應該具備嘅條件佢都有齊，原來Candy真係幾正！不過佢上次唔係怒睥我嘅咩？點解今日又咁Nice主動聊我講嘢？唔通佢唔記得咗我？
 
「Eh……係呀，我係Freshman嚟，啲Note邊度有得拎㗎？」我口窒窒咁嘔咗幾隻字出嚟，盡顯毒撚本色。
 
講完呢句說話之後，我並冇聽到預期中嘅恥笑聲，反而只係聽到佢用好溫柔嘅語調咁同我解釋：「呢份Note要喺Moodle下載再Print出嚟，堂堂都要用㗎！下次記得嘞！」Candy真係好Nice，Nice到我有點不知所措……
 




呢一刻我突然變咗個有自信嘅毒男，問咗佢一句：「係呢，你一間得唔得閒？不如教我去印啦？」
 
「吓……」佢猶豫咗一陣。
 
屌，今次仆街了……